NH 37 anepalutsü atema sen crore 400 agütsür

Imphal, April 10 (Agencies): Manipur nung Jiribam district adena Imphal aser Silchar, Assam sendaktepba National Highway 37 yanglutsü atema Centre-i sen crore 400 lemzüktsüogo, ta Public Works Department (PWD) Minister, Thongam Bishwajit-i metetdaktsü.
“Centre sorkari Border Roads Task Force nem highways yanglutsü aser anepalutsü atema mapa lemzüktsür. Ajisüaka, tesüiba Congress sorkari ketdangsüa inyakdang mapa inyaksaba ken o aika adoka aliba agi state sorkari lenmang yanglushiba maparen ketdangsüa inyaktsü sentong lir” ta Bishwajit-isa ashi.
“Iba onük ya Centre sorkar ket nung benoka lir aser April 20 tashi nung telemtetba ka agitsü. Manipur sorkar nem lenmang yanglushitsü atema temelaba agütsüra, May ita tetenzüklen tashi nung highway nung gari tiptema senzütsüsa yanglutsü” ta paisa shisem.
Prime Minister Narendra Modi-i sorkar kümteter mezüng anogo 100 nung teinyaktsü latetba nung NH 37 ya densema liasü. Ajisüaka, iba dak sendakba nung mapa kecha meinyak aser kulia kecha magütsü.
Manipur nung national highway ana aliba nung iba ya ka lir aser kanga tongtipang, kechiyong Manipur tashi train lenmang mali.