NH-61 inyakyim nung temolung masür

Langpangkong Tzukong Mungdang lenirtem June 30 nü National Highway yangluba mapa repranga jajadang agiba noksa nung angur.

Dimapur, Chiteni/July 01 (TYO): Tang teinyakdak aliba National Highway-61 two lane yangluba nung temolung masüba sangdong ka Mokokchung district kübok Langpangkong tzükong nung aliba nüburtemi lemsatep.
Langpangkong Tzükong Mungdang indang Road Coordination Committee convenor, Marsanen Imsong ajanga sangdong ka nung ashiba agi, DPR nung aliba ama mapa shidak inyaktsü asoshi nüburtemi nenshia shiaka mapa junga meinyakba tejashi tzükongangeri lemsatep.
Sangdong ajanga ashiba agi, Hyderabad nung amenoka aliba Sri Avantika Contractors (l) Ltd (aser Nagaland nung amenoka aliba Vertex Company) ajanga Mongsenyimti, Chuchuyimlang aser Unger yimtsüngtem telungzük nung NH-61 indang two lane yangludar.
Langpangkong Tzükong Mungdang tir M. Zulu Ozukum, Langpangkong Kaketshir Mungdang tir Washi Longkumer aser senior tem, Langpangkong Tzükong Mungdang indang Road Coordination Committee convenor, Mongsenyimti, Chuchuyimlang aser Unger village council züngsemtemi NH-2 (Mokokchung aser Tuli tsüngda) aser NH-702C (Merangkong aser Tamlu tsüngda) tang teyangludak lenmang reprangi Mongulbarnü ao.
Item lenmang tsügdong oa semdangba sülen senden ka mena NH-2 lenmang temolung süa meyangluba indang tatsü talang jembia liasü.
Iba senden nung osettsüset quality tamajung amshiba aser retaining wall tem junga meyangluba indang jembi. Senden nungsa züngsemtemi mapa jenjang tekübokba nung inyakba ajanga mepelaba lemsatepa liasü.
Asameyang junga mesüi tabi agi lenmang yanglu tenzükba ajanga anentsüh tesashi alua senotsü teyari (compensation) magütsüi aliba lokti aser nija meyong ki-o-jen raksatsü südi, ta senden nung adenertemi shia liasü. Lokti tentet balala aser putu menden ajanga ketdangser dang iba timtem reprangshima nüburtem ajangzüktsü mechi aibelena inyakba metongshitsütsü mepishi.
Iba senden nung adenertemi DPR nung aliba ama mapa junga inyaktsü akhangtsü lemtet aser iba mapa inyakba firm tem dang nübur temolung süa inyaktsü ajungshiba sangdong ajanga ashi.
Kasa mapang Langpangkong nüburtemisa Hyderabad nung amenoka aliba Keystone Infra Ltd ajanga Merangkong aser Tamlu jila tsüngda NH-702C junga yangluyonga aoba ngua pelaba lemsatep aser maneni tajungba nung inyaktsü ayongzük.