NH 702D lenmang nokdangtsü sentong thinena atar

Dimapur, October 30 (TYO) : Mokokchung district nung commercial vehicle owners’ associations-i November 1, 2016 nungi NH 702D nung ‘chakka bandh’ ayongzükba sentong thinena atar ta sangdong ka nung metetdaktsü.
Iba gari lenmang yanglushitsü atema aiben mepishia aruaka bangdakpurtemi mapa meinyakba anema iba lungkak aitba sentong alitsü ayongzük saka Mokokchung district administration-i mepishiba agi thinena atar. Ajisüaka, iba ya lenmang nokdangtsü telemtetba meyipa agirba masü, ta MTDOA President, Sentilemba, Pick Up Truck Owners Union Mokokchung President, Temsu Jamir, ANTA Mokokchung President, L.Tali Jamir aser Private Bus Owners’ Association Mokokchung President, T.Yatet Jamir nungeri külem sangdong ka nung metetdaktsü.
October 28, 2016 nü NH 702D dak sendakba nung ADC Mokokchung indang office nung senden ka amendang, district administration-i November 20, 2016 tashi anogo apuloktsütsü atema mepishia liasü, ta sangdong nungsa shia lir.
Senden nungsa department (National Highways)-i gari lenmang nung garitem senzütettsüsa lenmang yanglutsü ta ashi aser parnokisa mapa inyakertem den yariteptsü atema road roller agütsütsü aser lenmang nung ongken alibatem nembangtsü ta nangzüka liasü, ta parnokisa shisem.
Item onük nung ajemdaker October 30, 2016 nü MTDOA den Pick Up Truck Owners Union, All Nagaland Taxi Association Mokokchung District aser Private Bus Owners Union Mokokchung nungertem külem senden ka amendang tenokdangbaji thinena atatsü atema telemtetba agi.
Ajisüaka, November ita tetenzüklen nung ketdangsertemi gari lenmang yanglushiba mapa metenzükra, jeli osang kecha mesangoktsüi dang commercial vehicle owners’ associations-i lenmang nokdangtsü, ta parnokisa metetdaktsü.