NH-i taoba PM Vajpayee asüba mangyimer

Kohima, Luroi/August 18 (TYO): India nung taoba mapang Ato kilonser, Atal Bihari Vajpayee mapang talangka nungi shiranga aruba sülen Luroi/August 16, 2018 nü AIIMS Hospital, New Delhi nung asüba atema Naga Hoho-i jashia mangyimer, ta tanü Naga Hoho Tir, P. Chuba Ozukum-i sangdong ka ajanga metetdaktsü.
“Asür Atal Bihari Vajpayee ya takotet yimtenren lenir ka, sangro mejemer ka aser o tsüngrusonga jembir ka liasü, shibai yimtenren party mebendangi India meim. Pa ya yimtenren lenir ka aser India melenshija temaba jenjangi anir ka liasü,” ta sangdong nung shia lir.
“Naga nunger atema süoki ia bilemtsür ka makai kümogo. 2002 küm Naga nunger putiotsüji khenyogi balaka ta agizüker mezüng ato kilonserji pa liasü. Pa Ato kilonser inyakba mapang nung India-Naga yimtenren tebilemtsü latettsü ta Naga nungeri tamang kaa liasü, ajisüaka Naga yimtenren tebilemtsü melatetdangyongi pa Ato kilonser kümsük tembang,” ta sangdong nung shia lir.
“Pai Dimapur nungi Kohima tashi kilometer 72 jajatsü jangrabaji ajanga pai Naga nunger meimba kuli sayur, iba sülen pai Kohima-Dimapur tsüngda fourlane yanglutsü atema agizüktsü melungtet, aser ibaji Naga nungeri teti bilemtettsü,” ta kasa sangdong ajanga metetdaktsü.
“2003 küm Ato kilonser ka ama Vajpayee-i Nagaland indang sentsüh ajak aotsü, aser zero deficit Budget nungi tenzüktsü atema Nagaland nem senotsü teyari sen crore 1050 agutsüba ajanga pai Naga nunger atema aria bilemtsüba aser meimba kuli tejangja sayur. State jenjang ngur tesüiba küm 55 tsüngda nung aser Nagaland Legislative Assembly otsü nung Ato kilonser rongnung shingaia yamaji meinyak,” ta Naga Hoho-isa metetdaktsü.
“Atangji Naga nunger atema lenir ka makai kümogo, shibai Naga nunger timtem angateta liasü. Pa tanela tesünep nung anisüngzükdakjang,” ta kasa sangdong ajangasa metetdaktsü.