NH mokdanga aliba melapoktetba atema Manipur CM-i anentsüla: Javadekar

Imphal, January 15 (Agencies): Deobarnü Union Human Resource Development Minister, Prakash Javadekar-i, Manipur Chief Minister, Okram Ibobi Singh-i tang rongsenkettsüng lenmang mokdanga aliba melapoktetba atema pa menden nungi alutsüla, ta ashi.
Manipur assembly election atema candidate tem shimtsü asoshi Imphal nung aliba BJP office semdangdang pai osangbenertem dang iba o metetdakja liasü.
Manipur nung March 4 aser 8 nü assembly election agitsü.
BJP lenir Javadekar-i, “Linük Temzüng nung, tzüzüngozüng tensa atema Centre sorkari kecha meinyaktettsü, ibaji state mapa ta shia lir. Ajisüaka onoki pa (CM) nem teyari agüja paramilitary sepai company 40 agütsü,” ta ashi.
“Highways nung ozüng benoktsü atema itemji (sepai) amshitsü melena security sepaitemji barracks nung dang ayur. Iba timtem anendaktsütsü asoshi pai tamakok nguogo, anungji pai anentsüla. Tan election nungbo pa atsüngdoktsü, saka nüburtemi election atatsü menüngdak,” ta Union Minister-isa ashi.
Javadekar-i, “Nüburtem timtemba ngua Centre sorkari Centre, state sorkar aser November 1 nungi mokdanger, United Naga Council tsüngda ken o jembitsü achaayangogo, ska iba sendenji mekatet, kechiyong ken o jembitsü atema state sorkar nungi nübo meyok,” ta ashi.
Osangbenertem dang Chief Minsiter, Ibobi-i, Centre nungi formal tejaokba maliasü. Manipur ya tezülen arrtsü nung lir asünungji jungdak jaokdangyongi ketdangsertemi Delhi-i moutettsü, ta tamalen jembia lir.
Javadekar-i state BJP den senden mena BJP candidatets tem shimogo aser ibaji Central committee nem agütsüba sülen ang taruba hopta sangdongtsü.