NHAK nung mezüngbuba Spinal Fixation Surgery agi

Kohima, February 12 (TYO) : Naga Hospital Authority Kohima (NHAK) nung nisung ka dak Spinal Fixation Surgery agi aser iba surgery ji Nagaland sorkari lapokba mozüki nung tan mezüngbuba agir asütsü, ta osang angazüker.
Naga Hospital Authority Kohima (NHAK) nung department of orthopadics-i tetsür ka dak surgery agi aser iba ya Nagaland sorkari lapokba mozüki nung tan mezüngbuba lir, ta NHAK nung Senior Specialist Orthopadic, Dr. Gwalozu Thong-i Hokolbarnü metetdaktsü.
Hopta ka tejaklen arishi küm 38 tain tetsür ka süngtem tulu kati teberem yirutsü aser la dak spinal fixation surgery ji agi. La teberem sür tsünglanglen mapa meinyaki küma lir, ta Dr. Gwalozu Thong-isa ashi.
NHAK-i osettsüset tasen bener aruba amshia surgery ji agi. Iba surgery nung amshiba osettemji jenjang kanga tasak saka asen state nung nüngdak ta ajiteta osettemji bener aru, ta paisa shisem.