NHM mapa inyakertemi Dec 15 nungi lungkak aittsü

Dimapur, December 6 (TYO) : National Health Mission nung timtem ajurua aliba mapa inyakertemi December 15, 2016 nungi mapa meinyaktsü ta telemtetba agi.
December 15 tashi nung parnok nem magütsüi aliba itasen ajunga magütsüra, mapa meinyaki lungkak aittsü ta parnoki metetdaktsü.
Iba dak sendakba nung November 2016 ita tetenzüklena parnoki sorkar nem tezüluba ka agütsüogo. India sorkar ket nungi sen anguba sülen anogo 15 tsüngda State Health Society (NHM) nem itasen agüjang ta Ministry-i State Treasury nem tetuyuba agüjaka, ibaji meinyaker.
Sorkari sen magütsüba ajanga NHM mapa inyakertem mapang shitak nung itasen mangu timtemer aser khenkhenbo ita aika mangur. Tang tashi nung parnok nem August 2016 tashi dang itasen agüja lir aser ibaji ita asem dak tali lir ang agütsü.
Itasen monguaka, NHM mapa inyakertemi pei lemzükba mapa inyaka arur. July 2016 nung parnoki state sorkar dang itasen mapang shitak nung agütsütsü atema takhangba ka agütsü, saka itasen khen agütsüba sülen tanü tashi itasen magütsüi dang arur.
Sorkari ‘No Work, No Pay’ ta ser mapa inyakteter süra, onoki ‘No Pay, No Work’ ta ser lungkak aittsü, ta NHM mapa inyakertemi ashi.