NHM nung inyakertem longkak tesashiba aittsü

Kohima, July 17, 2016 17 (TYO) : National Health Mission (NHM) nung inyakertem telongjem senden ka mena parnok nem July 22, 2016 tashi nung ita sen magütsüra, July 25 nungibo longkak ait tenzüktsü aser August 1 nungibo shinga mapai maotsü ta telemtetba agiogo.
Iba longkak aitba mezüng sentong nung July 25 nungi nisung ajak leave agitsü aser iba sülen August ka nungi mapai maotsü. Mapa inyakertem nem ita sen magütsüba ya miimchir temeten anema lir, anungji kechisüdir süaka iba temetenji angutsü merangtsü ta parnokisa metetdaktsü.
NHM nung inyakertem nem  ita sen agütsütsüba sen ya center nungibo yoker ser nung, State Finance Department-i 2015-16 nung agütsütsüba ita sen ajak agi crore 1.40 magütsür, iba jagi inyakertema kanga timatemer aser mapa nunga tamakok angur ta parnokisa metetdaktsü.
State sorkari tang dang masü saka küm shia mapang shitak nung ita sen magütsüi arur, iba jagi mapa inyakertem tezüdangdaktsür aser shilumanemdang teyari shitak menguteti nübortem timatemer, anungji kija aser lokti tentet ajaki NHM nung inyakertemi akangba maparen nung nungitdaktsüner ta parnokisa mepishia metetdaktsüogo.