NHRA-i saru memeshitsü mepir

Dimapur, April 28 (TYO):  April 24, 2016 nü Nagaland Hotel and Restaurant Association (NHRA) Office HQ Dimapur nung Lokti senden ka nung adenertemi Nagaland Medical Dealers Association (NMDA) aser ACAUT-i ‘Saru Ka Sorkar Ka’ tangatetba nung noktakba pusema nungittsü bangjemtep, ta Acting Secretary NHRA-i sangdong ka nung metetdaktsü.
Senden nunng NHRA-i Nagaland nung maneni Hotel & Restaurant Industry jenjang ajungkettsü atema alizüng dak rangloker inyaktsü bangjemtepa lir, saka iba maparen nung tax saruba ajanga tetsükdaktsü ajuruba onüktem benoka olemtep.
Nagaland nung Hotel & Restaurant Industry ya business tajungtem rongnung ka lir. 2013 nungi 2015 tashi Hotel & Restaurant Industry dak sendakba maparen nung tetsükdaktsü ajuruyonga arur. Anungji Naga yimten teloktemi Annual Taxes mesüra 2016 küm atema saru memeshitsü mepishir, ta NHRA sangdong nungsa shia lir.
Nagaland nung Hotel & Restaurant Industry mapa inyaker aika Bank dak sendakba inyakyim kübok timtem balala lir aser anosa Nagaland nung business, kibong, company aser kijatem senotsü mali timtemba ajanga tetsükdaktsü ajurur. Item onük nung ammeter senden nung adenertemi külem züngsemtem tax tenüng nung amokmerenba magizüktsü telemtetba agi, ta Acting Secretary NHRA-isa sangdong nung metetdaktsü.