NHRA teloki ACAUT-i inyakba mapa nungiter

Dimapur, July 12 (TYO) : Dimapur nung nisung kari gari totzü nung kerosene enoker ayokba mapatem ACAUT teloki putetbaji tasü tait mapa ka lir, aser iba ama ochimashi anema inyakba mapa nung onoki kanga sashia nungiter ta Nagaland Hotel and Restaurant Association    (NHRA)-i metetdaktsüogo.
Iba ama nübortem ajunga akoksatsüsa inyaker ochimashirtemji bangdak nung alirtemi aputsüla aser tapet temerenshi agütsütsüla ta NHRA-i metetdaktsüogo. Parnok meyong kiojen aser ali kimong ajungaji government-i agiadoktsüla, kechiyong itemji nübortem ashiokja bendenba rongsentem lir ta parnokisa metetdaktsü.
Item  külakküpbongertemji jenshia senzüaka, kong lidir yangjj aputsü atema ozüng agütsütsüla aser item dak aketba license akar kiburtem ajak aputsüla. Iba ama ochimashi mapa yagi town nung dang masü saka state ajaklen nübortem ashioktsüogo. Ano, talisa sensakertembo küm aika ashioktsüogo ta NHRA telokisa metetdaktsü.
Nagaland nung kerosene mangu akümba aser jenjang atuba tebilemtsü ajak ya item külakküpbongertemi parnok ajangzüktsü asoshi inyakba mapa agi nübortem timtemdaktsüba mapatem lir. Iba mapa nung yimsüsür aser tulurtema dena lir, anungji parnokji temerenshi angutsüla ta NHRA telokisa metetdaktsü.
NHRA telokisa iba ama ochimashi mapatem anema lokti tentet ajak longjemer ACAUT teloki nungittsüla ta metetdaktsü.