Ni aibelena lira ni tepouktaki yokang: Rahul Gandhi

Delhi, November 19 (Agencies): Congress party tatong Tir Rahul Gandhi aser par kibong aitsüba dak sentakba nung tanü Rahul-i, pa aser par kibong nem tai tongloktsüba nungji tamentakak maka ta ashiba den külemi pai aibelena lira BJP sorkari pa tepouktaki yokang, ta ashi.

Rahul-isa, pa anema tai balala tonglokja lir, ajisüaka item ajak nungchi ochi mali, ta ashi.

Congress lenir Rahul-i, “Modi, nü ket nung agency tem lir. Bushisüngdangang. Ita trok tsüngda nai langka danga ngutetra ni tepouktaki yokang. Nai ni aser ozü kibong dak lishi teploktsür. Ni langka danga aibelena lir ni tepouktaki yokang,” ta ashi.

Hombar nü BJP lenir, Subramanian Swamy-i, London nung aliba nija company registration kakettem nung Rahul Gandhi-i pa British senso ta shia lir, ta sangdonga liasü.

Congress lenir Rahul-isa, pai Bharatiya Janata Party (BJP) aser parnok nem shisa agütsür Rashtriya Swayamsevak Sangh (RSS) tsübua mali, ta ashi.

“Ni aluyimertem aser aayangertem atema raratsü,” ta Rahul-i ashi.

“Sorkari tamakok angubatem maneni ni jungkai adoktsütsü,” ta paisa shisem.

Taoba Ato kilonser Indira Gandhi asoba anogomung 98buba nüngtem nung Delhi nung ayongzükba Indian Youth Congress convention sentong nung jembidang Rahul-i, BJP sorkar aser RSS anemtsüsa par party ket nung kuli lir, aser Bihar election osang ajanga nüburtemi Congress tangatetba pusemba kuli sayuogo, ta ashi.

Rahul-isa, RSS aser BJP-i tetsü (otsüla) Indira Gandhi aser tebu, Rajiv Gandhi na densema par kibong arishia arur, ta ashi.

“Indira Gandhi-i nüburtem longjemdaktsütsü asoshi inyak, aser iba nungji onoki temelung agütsür. RSS-i inyakba ama nüburtem tsüngda telemsa madokdaktsür,” ta Rahul-i ashi.

“Onok MP tera dang ta nisungtemi jembir. Onok MP ishika dang süra komaser onoki Land acquisition bill nokdangtet(?)” ta Rahul-i ashi.

“RSS aser BJP-i rara adokdaktsür saka Congress-i timtem mapang teyari agütsür, aser ibaji ajanga onoki Bihar nung takok angu,” ta Congress tatong Tiri ashi.

Youth Congress nung inyakertem tenüngsanga Rahul-i, “Onok dak tajangshiba lir aser nenok dak tejangraba lir, anaji ka kuma yanglutsüji kü mapa,” ta ashi.

“Indira-i Congress nem maitsü agütsü, aser taruba election tem nunga party-i takok angutsü,” ta paisa shisem.