Ni Ajuruba Nisung Ka Den Ni Ken Jembitsü Mapang Adok

– I. Imdang Ozüküm,  E.Er.BSNL.

1) Ni Dimapur nung college azüngdang nungi tanü tashi nung küm semer tema lia arudang küm ter tejaklen nungi nisung ka khu tulu(bag) teka abelen ka aser ajichi len ka aser tekong nung eloker tejaklen ka ta bener kidangisa aru aser ibai temenen khuret ka masü, ibaji osang tajung kaket tem liasü, ni paji aiben marudaktsünüi bilem, saka ibaji tamashi bilemba ka liasü. pai abenba khuji kg 15 nungi 20 tashi taret liasü.Pa angu dang Akümlir wadang otsü ang bilemteta liasü. Saka ibai kanga jangratemtsü ta tangang apiteta arur.
2) Kenü pa ozü kidangi aru aser ni kaket kar ali. Aser onok külemi sungo jema amendang, ni pa den ken sensak asemtsü mapang tajung ka adok, aser ni pa dang itemi asüngdanga liasü, aser pa telangzüba jagi ni süngmanga aküm, aser ibai kanga shidak ta ni tzüratema anga, pa tejangrabaji teyanglur Tsüngremi Pa tenzüktsü lenmang balaka nung shimtet südi, ta ni tangang angateta arur, kechiyong ola madoki mapa agi aser terenemba Tsüngsem tetsüng nung semer osang tajung sayua senzür nisung kaji iba nisung ya ta ni angatet.
3) Ni pa tang kechiba na khu tulu ya bener yamai jangraa belemseta senzür, kechiba ibaiang shimtet, ta asüngdang. Aser komasür tenzük (?) ta asüngdang . Aser pai yamai ashitsü tenzük.
4) Kütsü aser kübu tena chir onok tanur 13 aso aser kibong tulu asünung timtem aliba ajanga lanuwa nungi yimtak kü sasa ayanga kaket alia school azüngtsü tenzük aser kodang yimdak aliba school toktsütsüsa aküm,tsüraburi tanur ajakbo yaritsü kanga tasak liasü.
5) Anungji, kodang High School azüngtsü Dimapur-i ao, tsüraburi nüngdak ajakbo peria meyaritet nung tsürabur dak memetaloki alitsü meranga azüngtsü tenzük.Aser ozü atsü (Garden) nung motiram (Guava)Ongzüka bener Town nung yoka senzü aser iba jagi jang alia chiyonga liasü, aser süng sua anogo nung Rs 20/- hajira angu , aser anogo piyong atsü inyakdaktsüli Hajira Rs 20/- angu, iba jagi kaket alia ta High School azüng .
6) Ajisür komasa inyak, ta ni asüngdang nung , pai ashi, joko ni Calender yoka senzütsü tenzük, aser oda oda temeimer-i kaket yokjang ta ashi, aser Tsüngremer o züluba kaketnang nungi jembiteper Laishiba aser ken kaket , aser nisunger mulungdangtsü otsü kakettem yoka senzü, Idangji ni (Class X) Matric pass asü.
7) Kodang ni Matric pass asü, Tsüngremi ni Pa tenzüktsü aja. Anungji ni ( C .T. C. Theolugical college) Aolijen nung B.Th.azüng. Iba mapang nung rongsen jenti indoka azüng ta ni bilem.Ni college azüngdang kenu nunger aika High School nung züngya liasü, iba jagi ni joko küsasa yaritsü atema ano lenmang bushia Laishiba, ken kaket aser C D Cassette maneni ayoktsü atema Authority nungi temelaba meshir itemji ayok.
Ajisür ni School ka nung inyak. Ajisur College ka nung Warden cum Chaplain inyaktsü aja. Ajisür ita sen agia alir.
8) Ajisür ni School ka nung inyak. Ajisür College ka nung Warden cum Chaplain inyaktsü aja. Ajisür ita sen agia alir tetsür ka den ni kibong akümtsü Tsüngremi moatsü. Aser kibong kümli ni B A (Bachelor of Arts) azüngtsü tenzük. Final exam agütsür result matokdang ni ano, B.D ( Bachelor of Divinity) Degree azüngtsü ao.
9) Ni kodang B. D azüngtsü tenzük, sen jentisa jenti intoktsüsa aküm, ni ibaji züngaka ni kaket tasen tasen atokba ya bendena yoka B. D.renem. Ni college züngtemer süaka aser tanga nung mapa teinyaktsü jenti liaka asen Tebu Tsüngremi kü mulung nung tajaba ola ka aru, aser ibaji kaket ajanga Tsüngrem o ki telongi bener yiang ta jembi nung 2008 nungi asüngsashia Tsüngremer o kaket nang nungi agizüka Tsüngrem o kaket bener ki telong tonga Tsüngrem o bener tanü tashi iba mapa inyaka ni pelaseta jajar.
10) Adianu nübutsü ita sen agir süra kechiba na yamai belemseta khu bataka ya bener senzür (?) ta asüngdang.
11) Pai langzü , jangratema alitsü bilem nungbo ni ya meinyaktsü, kechiaser Yisui jangratema alitsü bilem nungbo iba limai asenok atema timtemtsü marula ta pai langzü.
12) Ni pa dang ano asüngdang, na iba mapa inyakba nung ya tajangzuk koma angur ? Pai ashi, ni kecha majangzüker saka nüburtem tanüla nung Tsüngrem dangi kaket azüngba ajanga Kotak lenmang dangi anidagi ta ni amanger aser aji kü tejangraba aser tajangzükji lir.Aser ozü kibong teti anema alir aji kü tajangzük ta amanger.
13) Ano ni pa dang asüngdang, na chirnur mali nung shiba atema yamai belemseta , timtema inyaka jajar ? Ya kechi tajangzük ?
14) Pai langzüa ashi, Philipi tapu 3 -20. Saka asen senso Kotak nung lir,aser ano idak nungjagi kümtetdakba ka oda kibuba Yisu Khrista arutsü, aji asoshi asenoki atar. Ken mejemeri ashiba agi Ken No.383 . Temeshipur ka alener misem anasa ni angu, pai kecha metsübu.pa tashi indang asüngdang, pai Kotak tsütsü repranger langzü, Khrista ajak. Khrista asoshiang tim atemtsü ni shimtet ta pai pelaseta langzü. Iba jagi kü mulung nung kanga dang kongshi.( maneni).
15) Anogo shia terongdong nung bener jajabaji kg 15 nungi 20 tashi bener senzür, saka aji pai mesasa, kechiyong pa lanuwa nungi ibai tenzük,aser Joseph aser Mary na Bethlehem nung tanendak bushir ama. Anepdang nungi aonung tashi tebelem mesasai senzür saka pa aikati maniketer. Saka shiri pa anendaktsür, iba kiji temoatsü kechiyong pai sarasademtsür aor. Kechiyong aikati sarasademtsüi mashii marui alitsüa akok.
16) Ashitsü agi, Khristan aini aoba mesük. Reprangang, pongmang nungji nisung ka süjen abener pei ki tsütsü tesülen shir teka nung kaket ka amer aser terongdong nung khu tulu ka benloker, nokdaka angu.Aser pai kaketji lapoker maneni züngya angu.Pai temeim kinungtsü den kecha meinyaki jangratema alitsü koka lir. Saka tashi angaba kilir ka asütsüla.
17) Pai amba kaketji temulung nung khrista agizukba kaket, kotaki aotsüba ( ticket) aser ibaji pa temulung agi aser tanüla ajak agi aser yimya ,aser mapa ajak agi iba kaketji azüng, aser ibaji Teyanglur Tsüngrem koda sür taküm aser mapa aser shi ajak agi bendanga tenzüktsü ta sür abenba Laishiba. Aser pai sarasadema ki shiai khuji bener atur. Saka iba khu ya temenen khuret abenba masü temeshi khuret abenba ka Khristan aini aor kilir ka.
18) Aikati ibai kanga junga agizüka pai bener aruba osang tajungji agizüker aser dokani sen indoka orr alir sen indoka ki bushitsü melena nür kidangi kaket, tapu tapu & chiyongtsü dena pa tetsüng aniseta bener arutsü nung pelaseta aser meima alitsü melena, asüküma mezüngmeshia ,sowar ama iba ama khu belemseta bener senzüba mapa teinyak ta, shi aser ango yoka nür kimai aru nung bazaar nungang tanangba angutsü amai asüküma aridok amai. Yamaji mangateteri inyaker.Saka tangatetertemibo temeim aser temoatsü ta angateta talitsü tim tashibo pelashishia alir, aser temoatsü angur. Pa atuba ki shia nung sarasademtsür aoer.
19) Iba NISUNG B.Th/B. A/B.D/(Bacholer of Divinity ) tashi azüng saka pa kaket ayoksang ta ajar aser kecha nunga mamshir. Ajisüaka kecha memeteter ka ama kaket ayoksang ta , tazüngba nungbo pa azüngba matoksa nisungi jembir. Tila akümbaji Tsungrem dang koda tajungtiba ( SEMPET). Yisui tila kümer alima menen alangzüktsü aru ama ajemaludi.
20) Pai ashir pulpit nung jembibaji dang Tsüngrem mapa masü, saka Pai nisung shia nem sempet balala agi kibuba mapa tenzüktsüla ta angatet , Filipi tapu 1:30 ji Khrista dak amangtsü asoshi dang masü saka ano Pa atema timatemtsü nenok nem agütsü ta angatet. Yakob tapu 2: 14 nungi Kü adianutem, nisung kati pa tamang lir ta shira saka pa mapa melira kechi tajangzük ,iba tamang jagi pa kümzukteterma ? Adianu aser adianutsür ka mangsa, aser anogo shia chiyongtsü mengui lira, aser nenok rongnung parnok dang nenok lemlema tipdema oang ta shira saka parnok temang tenüngdaktsü oset nenoki magütsüra, aji kechi tajangzük ? Yamaji tamang, mapa melira, pa kija tasü lir. Au nisung kati ashitsü, na tamang lir aser ni mapa lir ; nü mapa medeni nü tamang kü dang sayuang ? aser kü mapa agi kü tamang sayudi, (tekong 20), O tamashi nisung, mapa medeni tamang tapong ta nai meteterma ( tokong 24) saka mapa agi nisung metendaktsür ta nenoki angur.
21) Pai junga angatetbaji: Efesa 6:15 Aser tesünep osang tajung terenemba tsüngsem tetsüng nung semer nokdakang. Pai ashi, tazünger aika pei tsürabur nem mesüdakja kazüa taküm arishi süitembaji tesasatsüka mebilemer ta pai ashir.
22) Ni ya shinür, Tsüngremi na aser ni nüngdak ka yur yanglu.A.Shin 6: 6 nung, Na azümesen, meja dangi oang, la yimya bilemdangang aser shisa kaang. Meja-i kodanga memejanger mapa inyakba kodanga manener. Pai ajungshir, A.Shin 6:9, Oh azümesen, Nai kobiga mejangtsü ? Na mejangba nungi na kodang saktsü ?
23) Pai ashi, kaket yoka jajabaji ni tajangzük kecha balaka mangur saka meimchir nem Tsüngrem o ki tonga bener oa agütsüba jagi ni tepela ka aiter aser ni ken tena jajar ta pai ashir.Ni angudang, aikati pelashishia ki telongi anioker, aser aikati gate nung alidang, dangbo kecha malitsüa no ta ni kecha mashidang songtemadoker.Temeimtsüka meshimetsür arur ama ,saka adianu nur kidangi temoatsü ka bener arura meshitet surnung, kechiyong pai sarasademtsür ayazüka aor.
24) Pa mezüng modiram yokzükba agi bicycle tejen ka alizük aser scooter tejen ka ali idakji senzüa Tsüngrem mapa inyak, ano ibaji kanga raksar ka asüba agi aputena scooter tasen ka ali. Pa BD züngaka pai kaket ayoktsüjiang pa tejangraba, pa ya kechi telok mesüra mongdang südir süang iba kimaji Tsüngrem o kakettem ayoktsü asüngdanger, saka aikati, revival mapang nunga onok business mapa inyakba mapa inyaker masü, anungji memelatsü ta sür laishiba meyokdaktsüi meyipa yoker. Yamaji telok aikati nokdanger saka aikati pa nem pelashishia ayoktsü melar aser nüburtem kaket tajung alia temoatsü angur. Iba mapang nungji Tsüngrem meteter kati pa yaria mapa tajung inyakba ajanga tangbo VAN gari ka ali aser Tsüngrem tenzükba nung tali ajungba inyaker . Kotak nung rongsen rizüngbaji aji asütsü ta ajiteta tazünger temoatsü angutsü asoshi iba otsü zülur.Tangatetba aser tajungleni azünger ajak moajangma. Amen.