Ni Arunachal-i arura tepsettsü asü? : Swami

Guwahati, September 27, 2024 (Agencies): Arunachal Pradesh nung aliba Donyi Polo Airport nungi “Gau Dhwaj Yatra” agitsü memelai meyipa yokba atema Jagadguru Shankaracharya Swami Avimukteshwaranand Saraswati Maharaj-i mepelaba metetdaktsüogo.

Swami Avimukteshwaranand-i video ka nung iba tatalokba indang lemsatepba den nashi kümzüka ayuba mapa inyaktsü aser Arunachal Pradesh nunger den olemtep alitsü metetdaktsüogo.

“Ni Arunachal telungi aitra, nenoki kechi inyaktsü? Nenoki nü tepsettsü. Anungji ni nashi kümzüktsü atema renema lir, asenoki nashi dang oja ta ajar” ta Swami Avimukteshwaranand-i ashi.

“Ni kaketshirtem dang kü dangi arutsü aser kü den olemteptsü mepishir. Nenoki dang jaokra ni ano arutsü aser iba ajanga mangatettep alibatem angatetteptsü. Ni nenok tsükchir masü” ta Swami-isa ashi.

“Kaketshirtemi ni anema lungkak aittsü melena shisaliok nung temulung agütsütsüla. Ni nashiji kütsü ama züngshir saka lungkak aiter kari chiyungtsü ama züngshiba ajanga ni noktangba” ta paisa ashi.

Pa Arunachal Pradesh telungi aitra airport nung tim masüba inyaktsü akok ta pa dangi shidi ka aruba indang Swami-isa ashi. “Iba ya ozüngi memelar, kaketshirtemi item amala mapa meinyaktsüla” ta paisa shisem.

“Ni nashi kümzüka ayutsü nangzükba ama inyaker aser Arunachal Pradesh lanurtem den angatettepnür aser amalitep kanür. Ni ”Gaumata Rashtramata’ ta züluba wako ka bener arur. Ni India ya ka kümdaktsünür aser iba atema asenok tongteprateptsüla” ta Swami-isa ashi.