Ni Ato kilonser akumtsü tejangraba mali: Nitish Kumar

Patna, June 06 (Agencies): 2019 Lok Sabha election nung BJP den madenba party tem Front nung Bihar Chief minister, Nitish Kumar Ato kilonser candidate asütsü ta jembiba mapang ka nung tanü pai, pa Ato kilonser akumtsü tejangraba mali, ta ashi.

‘Super-30’ tentetsang, Anand Kumar indang taküm otsü kaket ka sayatsüba sentong nung jembidang Bihar CM Kumar-i, “Kü akumli nung ni khen danga MP kümner. Ni kodanga chief minister mesüra Ato kilonser akumtsü tejangraba maliasü,” ta ashi.

BJP lenirtem aitsüba olen ka nung Kumar-i, “Ni kodanga Ato kilonser mekümnütsüsa nisung kari kü tenüng menüktsütsü meranger. Ajisüaka parnoki amajok nung ibaji meranger, kechiyong ni Ato kilonser akumtsü tejangraba mali,” ta ashi.

RJD Tir, Lalu Prasad, NCP lenir, Sharad Pawar aser taoba mapang Jharkhand Chief minister, Babulal Marandi nungeri Nitish Kumar ji Ato kilonser akumtsü tetemsü ta jembia lir.

“Super 30 – changing the world of 30 students at a time” kaket ya Canada nung alir Biju Mathew aser Bihar nung osangzülur Arun Kumar nati zülu. Biju Mathew ya University of British Columbia nung associate professor aser consultant psychiatrist ka lir.

Kaket tapak 236 aliba kaketji English oshi nung ‘Penguin’-i aser Hindi oshi nung ‘Prabhat Prakashan’ adok.