Ni bilemba dang nungi Alia-i takok tulu nguogo : Mahesh Bhatt

Mumbai, August 17 (Agencies) : Film yanglur Mahesh Bhatt-i ashiba agi par jala Alia Bhatt atema kanga nüma tanga bilemer aser lai tamakok-a metettsüla ta shisem.
Alia-i küm 5 tashi Bollywood nung shilem agia arudang Highway, 2 States, Humpty Sharma Ki Dulhania, Kapoor and Sons, Udta Punjab film tem nung shilem tajung agiba atema tenüngsang nguogo. Lai shilem agiba Shaandaar film-i dang takok junga mengutet.
“Kanga junger. Alia-i tamakok-a metettsüla. La tanga meimchirtem den kasa dang lir” ta tebu Mahesh Bhatt-i osangbener dang ashi.
“La tangazüker ka nungi Udta Punjab film nung actor tajung ka ama shilem agiogo. Lai iba film nung shilem tajung agiogo. Udta Punjab nung ni la angudang kanga süngmang” ta paisa shisem.
Tanü-asüng Bollywood actress aika Hollywood-i aoer aser osangbenertemi Mahesh dang Alia Hollywood-i aotsü telemtetba agi nung pai haihaura agizüktsü asü masü ta asüngdangdang, “la tain kümogo aser ni bilemba dang nungi takok ulura nguogo. La taküm nung la kibur lir aser lai kechi mulungdir inyaktsü” ta pai langzü.
“Lai kechi lemtetdir inyaktsü akok, ni la den külemi jajatsü, yaritsü aser la pusema nungittsü” ta Mahesh-isa shisem.
Mahesh Bhatt-i TV show Naamkarann nung creative writer ka ama tang mapa inyaker. Iba sentong ya taruba ita nungi Star Plus channel nung sayutsü.