Ni BJP metoktsütsü: Yashwant Sinha

Jabalpur, Tsüklai 01 (Agencies): Tanü BJP lenir tain, Yashwant Sinha-i, pai BJP party metoktsütsü, ajisüaka parnoki dang melungra party nungi pa jendoktsü akok, ta ashi.
BJP-i aniba NDA sorkar mapatongtem anema nokdaktsü atema yakünü BJP lenir, Sinha-i ‘Rashtra Manch’ tenteta liasü, aser pai ashiba agi, BJP züngsem ka asüba dang nungibo linük senso asüba jenjangji tuluba.
Tanü Jabalpur nung osangbenertem den jembidang pai, “Ni party metoktsütsü, saka parnoki ni jendoktsü akok,” ta metetdaktsü.
Taoba mapang Union finance minister Sinha-isa, pai nisung kar mesüra party kar manemer, ajisüaka party mapatongtem anema nokdaker, ta ashi.
Paisa, Rashtra Manch ya aluyimertem aser mapa mengui alirtem atema ola adoktsü asoshi sabang ka lir, ta ashi.
“Balaka shisadangertem anema Investigating agencies amshir. Ibaji ajanga linük nung BJP nung madenertem atemabo tetsübu tensa ka lir,” ta pai ashi.
BJP lenirisa, tang tesütiba Economic Survey ajanga mapa manguba, shisaliok dak sendakba nung timtem aser aluyimertem timtem onüktem indang ashir, ta shisem.
“Item tebilemtsü ka manger mesangwa nung adokba masü. Tesüiba küm asem nung sorkari lenla ajak nung tamakok nguogo,” ta paisa sorkar aitsü.