Ni Cristiano Ronaldo den metokteper: Messi

London, October 23 (Agencies): Argentina aser Barcelona nungi nüngutugu football asayar Lionel Messi-i, “Ni Portugal nunger Real Madrid nungi asayasang, Cristiano Ronaldo den metokteper saka ni asayaba telok koda ser tajungba akümtsü iba dakji rangloker asayar,” ta ashi.
Messi, “Nüburtemi aika jembir aser olulu aika adoktsür. Ni Ronaldo den metokteper aser paia yamaji kü den metokteper ta ni amanger. Ni ozü club ajungtsü asoshi dang bilemer,” ta ashiba Efe osang ajanga Hokolbar nü metetdaktsü.
‘FIFA World Player of the Year’ senpet pezüben angusang, Messi ya La Liga asayamung nung September 10 nü Las Palmas den asayaba mapang temok yiurba tang anepalu tesüdak lir.
Pai, “Asayar ka atema anema alibaji kanga nüngdak. Ni tangbo doctor temi anisüngzükang ta ashiogo. Kodang nungiang asayatettsüar ni meshitettsü saka doctor temi kodang nung asayatsü junger ta shidir idang nungjagi asayatsü,” ta ashi.