Ni film direct asü nungbo, idakji shilem magitsü : Aamir Khan

Mumbai, May 24 (Agencies) : Aamir Khan-i ashiba agi pai film ka direct asünungbo, iba film nungji paibo shilem magitsü.

MAMI Film Club tenzükba sentong ka nung film director indang onük jembidang, Aamir-i “Actor ka ama nai director dang temulung alemer, saka ni mezüng film nung shilem agitsü tenzükdangbo, kü den tangatetba nung meputepba director tem ni shilem agiogo” ta ashi.

“Anungji, ni film yangluba piyong timtem ajuru. Iba sülen ji ni director tem shimteta dang parnok den shilem agir. Ni film ka direct asü nungbo, ni iba film nungji act masütsü” ta paisa shisem.

‘PK’ nung shilem agisang Aamir indang taruba film ji ‘Dangal’ lir.

Iba film ya Ashwini Iyer Tiwari-i direct asür aser Aamir-i Mahavir Singh Phogat indang shilem agir.

Mahavir-i par jala ana- Babita Kumari aser Geeta Phogat na dang melanteptsü sayu aser India nunger tetsür melangteper kati mezüng takok angubaji Geeta lir. Lai 2010 Commonwealth Games nung gold medal (55 kg) angu aser Babita-i silver medal (51 kg) ngua liasü.

Film nung Aamir-i Phogat lanuwa aser tambur naprong indang shilem agir aser pai tambur jilu aitsü atema temang touzük seret 95 tashi uludaktsü aser iba sülen ano temang touzük ajema kümdaktsü.

‘Dangal’ film ya taküm December 23 nü sayatsü sentong lir.