Ni Hindi film direct asütsü: Nagraj Manjule

Mumbai, April 28 (Agencies) : Marathi film “Sairat” direct asüsang, Nagraj Manjule-i, khenbosa Hindi film direct asütsü, ta ashi.
Brihostibarnü Mumbai nung 92.7 Big FM-i pa nem Maharashtra indang ‘Icon of the Year Award’ agütsü aser pai iba sempet agütsüba sentong nung megastar Amitabh Bachchan den külemi inyaktsü akok ta olen ka ashi.
“Tang tangbo ni ajunga meshitettsü. Ibai jembitsü ano tera karara. Ajisüaka tarutsü nung khenbosa ni Hindi film kabo direct asütsü,” ta pai ashi.
Hindi aser Marathi film industry tem lokteper inyakba nung terenlok aketba indang jembidang pai, “Film tajung kija yanglu tashi industry koba den südir süaka lokteper inyakba maparen nung timtem malutsü,” ta ashi.
Sempet anguba sülen Nagraj-i, “Meranga inyakba atema sempet angudang nema tanga bilemer. Asen tebilemtsüji asen mapa atema asütsüla. Nü mapa junger ta tushiba temaitsü tangari nü nem sempet agütsür,” ta ashi.
“Sempetji nü mapa junger ta agizüktetba aser tushiba temaitsü lir. Sempet ajanga nü mapa tuluba mekümdaktsür, ajisüaka mapa nendaka inyaktsüji asen tebilemtsü amai nibo bilemer,” ta paisa ashi.
“Kü tenünga film industry nung director tajungtem rongnung tetshiba asoshi kanga pelar. Küm paika ya iba industry ya parnoki tejakleni anir aoer aser nibo iba nungji shilem tila ka nungang dena lir, ta Nagraj-i shisem.