Ni Hindi film nunga shilem agir: Freida Pinto

New Delhi, November 23 (Agencies): Hindi oshi jembiba film-tem nung shilem agitsü atema tetsükdaktsü kecha maliba olen ka America nung alir India tsür actress, Freida Pinto-i metetdaktsüogo.
Nungtugu Slumdog Millionaire film nung shilem agiba nüngtem nung Oscar sempet agizükba sülen Freida Hollywood nung kanga dang nungtugu actress ka aküm.
‘Rise of the Planet of the Apes’, ‘You Will Meet a Tall Dark Stranger,’ aser ‘Knight of Cups’ nunger densema, Freida-i Hollywood nung yangluba tongti film-tem nung shilem agiogo.
“Ni Hindi oshi jembiba film nung shilem agitsü atema tetsükdaktsü kecha mali. Ni Marwari oshi mejembitet aka, Marwari film, Trishna nung taoba mapang takok ngua shilem agia liasü,” ta Freida-i osang jangjashitsü.
“Film nung shilem agir nisungji masü saka film indang otsüji tongtipangba lir,” ta arishi küm 32 tain Freida-i ashi.
Slumdog Millionaire film produce asür rong nung densemer, India nunger Tabrez Noorani-i direct süa yangluba film, ‘Love Sonia’ nung Freida-i tesüsa shilem agia lir.
Taruba 2017 küm alima dang sayatsü renemba film nung Anupam Kher aser Adil Hussain natia shilem agiba osang jangjaogo.
“Ni English oshi film nung dang masü saka Hindi film nung shilem tagidak lir,” ta Freida-i metetdakja liasü.