Ni Hollywood nung iyaktsü jangra mali: Aamir khan

Mumbai, January 18(Agencies): Hollywood nung inyaktsü asoshi kecha tejangraba mali, saka pa jangradaktsütsüsa International mapa kar arura iba nung shilem agitsü nungnanga mali, ta Aamir Khan-i ashi.
“Ni US nung oa mapa inyaktsü asoshi kecha tejangraba mali. Indian film tem nung mapa inyaktsü asoshi ni kanga jangrar. Ni Indian film nung joko küm 25-26 inyaker, aser nüburtem den tesendaktep kanga junga lir, koba kü asoshi kanga senti ta ni züngshir, saka International jenjang nung nüburtem peladaktsütsüji tebilemdangba kanga tamajungbo masü, ni mejangraba dang, aser kü sentong nung international film nung shilem agitsüji mali,” ta Aamir-i osangbenertem dang ashi.
“Ni jangratsüsa international film tem nungi arura ni inyaktsü. Japan nungi ni aginütsüsa maongka ngura ajia ni inyaktsü,” ta paisa shisem.
Hollywood film tem Jurassic Park, Spiderman series aser The Jungle Book amala India nung kanga nüngtugu küma sen aika aaba dak sendakba nung Indian film tem atema kecha tetsübutsü aser tetoktepba ali mali ta pa dang asüngdang dang pai ashiba agi, “Indian cinema Hollywood nungi kecha tetoktepba mali. Asenok tsübutsüba ajunga agi asenok dang lir. Film junga meyanglura asenok sapurtem samatsü. Ni bilemer asenok mapa nung shingaia arua mamoshitettsü. Film ji kechi oshi südir süang tajung dang jungra ajaki aji reprangtsü, anungji asenok nükjidong ajak agi film junga yanglutsübaji dang asütsüla,” ta Aamir-i langzü.