Ni India den nangzüktepba kecha miima mayu: Hasina

Dhaka, April 13 (Agencies) : Tan India aser Bangladesh na tsüngda tenangzüktem ayuba nung Bangladesh opposition lenir Khaleda Zia-i Ato Kilonser Sheikh Hasina aitsüaka Hasina-i, ni India semdangba mapang Khaleda-i miimshiba ama kecha memiimshi, ta ashi.
Bangladesh Nationalist Party nung mendenbulai, Ato Kilonser Sheikh Hasina India nungi teka tazüng aru. India-i la dang inyaktsü merangtsü indangang ashi, ta Bodhbarnü osangbenertem den jembiba mapang ashi.
Khaleda-i ashiba agi, nüburtemi Bangladesh sorkari pei teinyaktsütem asen linük dang tashi taitba aser tuluba tsüngdang miima meyuteter ta ashir.
Lai India den defence tsütsü tenangzüktep ayuba dena ashishi.
Khaleda-i, Awami League sorkar dang political telok balala aser lokti aikati bendanger linük den defence tsütsü tenangzüktep magitsü Hasina dang shiogo, ta ashi.
Khaleda-i aitsüba langzüa Hasina-i, “Memoranda of understanding (MoUs) tem nung sign asüdang nüburtem nem memetetdaktsü, ta BNP leniri ashir, saka ni la dang tasüngdangba ka dang asüdangner : Lai tesüiba mapang China den defence tsütsü tenangzüktep nung sign sütepdang shiba dangsa asüngdanger inyak ? Iba tenangzüktep nung kechi liasü ibaji shingaia mangu,” ta ashi.
“Khena nibo lai amai kecha memiimshi ati,” ta Ganabhaban nung Awami League Working Committee senden ka amenba mapang ashi.
Hasina-i, item tenangzüktep nung sign masüdang cabinet nungi tama temelaba agitsü atema yuja liasü, ta ashiba osangbenertemi ashi.
India semdangi mao tsüngda item tenangzüktep indang Foreign Minister Abul Hassan Mahmud Ali-i osangbenertem den senden ka amenba mapang jembi aser Bangladesh aser India na külem sangdong ka nunga metetdaktsüogo, ta Hasina-i ashi.
“Tenük junga lir sürnung mangurtem dang ni kechiang mashir,” ta lai ashi.
India den item MoU tem sign sütepba ajanga Bangladesh kanga ajangzükogo, ta Ato Kiloner Hasina-i ashi.
“Asenoki India nungi light, diesel aser gas tebilemtsü nung yaritsü asoshi LNG bener arutettsü,” ta ashidang Hasina-i, India-i sen billion 4.5 aputsütsü shiogo, ta shisem.
Khaleda-i Teesta tzü atema tenangzüktep magiba atema Hasina aitsüba ajanga Hasina-i, “Khaleda Zia-a tesüiba mapang Ato Kilonser liasü, süra laia kechiba Teesta tzü bener marutet?” ta asüngdang.
Hasina-i taoba hopta India semdangba mapang India den tenangzüktep 11 aser MoU 24 nung sign sütepogo.