Ni India-i meyipa arutsü ano mapang matong: Mallya

New Delhi, March 13 (Agencies): Business tetsüti Vijay Mallya-i, ni jenshia jajar masü aser ni India-i meyipa arutsü kecha arisanga mali, ta Deobarnü metetdaktsüogo.
Mallya-i, “Ni kecha tai inyaka mali sür nung ni aitsür,” ta Sunday Guardian den email interview ka agiba mapang ashi.
Nai March 2 nü India toktsübaji sentsüh maotetba agi asü ?  ta asüngdangdang pai, ni kü tembar ka den nija nüngdak atema aini ao, ta langzü.
“Ni business atema aini ao masü. Aikati ni khu tenet bener liasü ta shiogo, ajisüaka aji khu aika masü kechiba süra ni aini aodang teti khu yamaji bener jajar. Ni jena ao ta ashibaji tai,” ta pai ashi.
“Kechiba ni ozüng raksar ka ama amshir? Senputsübuba nung timtem adokbaji business yimya lir. Bank-i sen aputsüdang iba dak sentakba nung timtem ajurutsü alibaji parnoki meteter ang aputsür. Ya asenoki masü parnoki lemteter aputsür,” ta paisa shi.
“Onoki business kanga junga takok ngua liasü ajisüaka ajungbena chirep. Tai ajak kü nem dangbo tetongloktsü. Kü dak tebilemba tajung lir. Ni jembiba o mashilen angatettsü asüba agi ni ola madoker dang,” ta Mallya-i ashi.
Na tang kong alir ta asüngdangba mapang pai, “Ni aoba ajak shira ni shisa makaba nisung ka ama akümtsü. Ni ozüng alema benshiba nisung tamajung ka masü aser ni tang anisüngzüka liner,” ta langzüa liasü.