Ni India meimbaji nai (Modi) magientsütettsü: Sonia

New Delhi, May 09 (Agencies): Ato kilonser, Narendra Modi-i Congress Tir, Sonia Gandhi Italy den sentaktepa olen ka nung aitsüba sülen anogo ka lir tanü Sonia-i, “India ya kü talitak lir, yangi kü tango tesüsabuba sashitsü,” ta ashi.
Kerala assembly election atema nüboyimtsü tenzükba anogo nung Sonia-i, “Ni India atema inyakba aser kü linük, India meimbaji Ato kilonser, Narendra Modi-i magientsütettsü,” ta ashi.
“India ya kü talitak. Yangi kü mitsü aremtsü, kechiyong ni meimertem indang azü iba ali nung meyoktepa lir ,” ta lai ashi.
Ato kilonser Modi-i Italy tetshiba atema telangzüba agüja Sonia Gandhi-i, “Atangji ni Italy nung aso. Indira Gandhi’er jala ka ama 1968 küm ni India-i aru,” ta ashi.
“Ni India nung kü arishi küm 48 liogo, iba ya ni talitak aser iba ya kü linük,” ta laisa shisem.
Sonia-i, Modi sorkari secular aser democratic tajemdakdak tepsettsü meranger aser lokti nung tekübok jenjang nung alirtem sentoker, ta aitsü.
Ato kilonser Modi maneni aija Sonia-i, Modi-i tanga linüktem semdanga o lemteptsü atemabo mapang peria angur saka linük nung aluyimertem aser sensakertem atemabo mapang mangur, ta ashi.
Yashi Modi-i odiodia VVIP chopper ochimashi ken o nung Sonia aija jembi.
Modi-i, chopper aliba atema tezüngzüktep agidang süpokrem agir tenüngtemji jungkai adoka sangdongtsüla aser aibelenertem nem temerenshi agütsütsüla, ta takhangba agütsü.
Modi-isa, “Iba mangatettep ken o nung Congress Tir tenüng densemdaktsübaji ni mesüra ozü sorkar nungi shinga ajanga masü, saka Italy nung aliba court ka ajanga lir,” ta jembia liasü.