Ni India ya melemsadaktsüner: MIM tongti Asaduddin Owaisi

Hyderabad, September 22 (Agencies): Tanü Majlis-e-Ittehadul Muslimeen (MIM) tongti, Asaduddin Owaisi-i, ni India ya melemsadaktsüner saka tashi taliba itshidaktsüner, ta ashi.
Deobar nü Union Minister Najma Heptulla-i Hyderabad semdangba mapang Maulana Azad National Urdu University (MANUU) nung jembiba dak sentakba nung Owaisi-i, “Ni linük nung telemsa madokdaktsüner saka tashi taliba itshidaktsüner. Muslim nunger-a akhümtsübur aser linük nung senso tajung ta ni sayuner,” ta ashi.
Hyderabad nungi Lok Sabha züngsem Owaisi-i, BJP atema MANUU ya olulu prokba tiyongtsü ka kümogo, ta ashi.
Union Human Resource Development Ministry-i iba reju nung Chancellor menden atema Sareshwala shimtsü mechi nung Azim Premji, Gulzar, Amitabh Bachchan aser tanga nüngtugu nisungtem sentok, ta aitsüba mapang ka nung Owaisi-i item o jembiogo.
Party headquarters Darusalam nung sorkari acha ayangba Urdu meduium school ka nung kaketshirtem nem shisaliok dak sentakba osettem lemtsüba sülen jembidang Owaisi-i, pai temeten aser ochi obendang atema rarar, ta ashi.
“Ni Muslim nüburtem sensak tia samadaktsüner aser iba asoshiji ni tetsür aser teburtem shisaliok ngudaktsüner,” ta pai ashi.
Sensak tia ajanga school züngpeter anener Muslim nunger aika lir, sorkari scholarship agutsüba nung züngdangba tatakzük mayutsüla, ta paisa ashi.