Ni jangraba film tem nung shilem magitet: Neha Dhupia

Alwar, March 23 (Agencies): Neha Dhupia-i 2002 küm Miss India adokba sülen, Bollywood joko küm 10 shi shilem agia arudar. Item kümtem nung takok aser tamakok ajak ajanga aruba meyipa reprangdangdang Neha-i la takoker ka ama bilemba lemsatep.
“Ni papika ya tetsükdaktsü aika ajanga arutetba bilemdang dang kanga süngmanger, saka ni jangraba film tem nung shilem magitetba atema tezüdanga bilemer,” ta osangbenertemi la wadang indang asüngdang dang lai langzü.
Arishi küm 36 tain actress, reality TV show ka atema shilem ka tangokba mapang lai ashiba agi, nüburtemi reprangtsü asoshi jangraba film tem nung lai shilem aginür.
” ‘Ek Chalis Ki Last Local’ mesüra ‘Mithiya’ nunger amala film tem nung shilem agiba mapangbo nüburtem item amala film reprangtsü asoshi merenemi liasü, saka tang yamala film reprangtsü asoshi jangraba mapang nungbo ni shilem agitsü asoshi maongka mangur. Tetsükdaktsü aika ajanga ni aruogo. Ni film industry nung joko küm 13 buba shilem agia arur aser ni ajangtetba jenjang asoshi kanga nüma tanga bilemer,” ta lai ashi.
Taküm nung tesasaba kecha ali mali ta asüngdang dang lai langzüba agi: “Tang tashi nung kecha tesasaba mali. Ni kanga pelar aser maneni shilem agitsü asoshi jangrar. Tang kü wadang nung ni mepelatsüsa mapa kecha meinyaktsü,” ta laisa ashi.
‘MTV Roadies Rising’ nung shilem agiba dak alaka ‘Chhote Miyan’ nunga la host asütsü.