Ni Jayalalitaa tsüngsü nung jajaogo aser jajadar: Panneerselvam

Chennai, February 08 (Agencies): O. Panneerselvam-i, pa Tamil Nadu Chief Minister menden nungi alutsü pa rongshi, ta ashiba sülen anogo ka lir tanü pai, assembly nung pai tashi sayutsü aser pa den adentsü atema pai taoba chief minister J. Jayalalithaa’er kinunger, Deepa Jayakumar-a jaoker, ta ashi.
Panneerselvam-i, “Ni party kodanga mashioktsü aser mashioktsütsü. Ni sodi meshiba agientsü. Kü nem maongka agütsüra assembly nung MLA temi ni pusemtsü. Taoba chief minister Jayalalithaa tsüngsü nung ni jajar aser ni kodanga lai memelungba meinyak,” ta metetdaktsü. Tanü pa den Kavundampalayam MLA, V.C. Aaru Kutty aser Rajya Sabha MP, Maitreyan nata liasü.
Paisa, “Assembly senden yakta ayongzüktsü atema ni Angh, C.H. Vidyasagar Rao aser Speaker na ajurutsü. Amma (Jayalalitha) küm 16 jungnüa chief minister inyaka liasü. Ni anaben dang chief minister akum, aser ibaji Amma-i melungba ajanga liasü. Ni la tsüngsü nung teti jajaogo aser maneni la tsüngsü nung jajatsü,” ta ashi.
Sasikala Natarajan ji khenpiga atema dang party general secretary lir ta shia Panneerselvam-i, “Council-i khenpiga atema dang general secretary shimtsü akok. Party temzüng nung, general secretary shimtsü atema election ka junga agitsü nüngdak. Nüburtem kü den lir,” ta metetdaktsü.
Jayalalithaa asüba nung melung malemba dak sentakba nung tasüngdangba ka langzüdang Panneerselvam-i, iba kuli bushitsü atema Supreme Court nung anisüngzüker aliba obendanger kati aniba bushisüngdangba luden ka tentettsü, ta metetdaktsü.
Ano külen Panneerselvam pusemer AIADMK lenir P.H. Pandiya-i, “Panneerselvam kümzüktsü nüngdak. Pa menden nungi magientettsü,” ta ashi.
Paisa, Sasikala-i rongsen bendentsü dang jangrar, ta aitsü.
Panneerselvam-i yazü jembir: Sasikala
Ano külen tanü AIADMK general secretary, V K Sasikala-ia Tamil Nadu chief minister menden bena alisang, O Panneerselvam aija, Panneerselvam-i yazü jembir, ta shiogo.
Tanü party headquarters nung AIADMK MLA tem den jembidang Sasikala-i, “Deobarnü legislature party züngsemtem senden amenbaji miimshia agiba masü. Ibaji osangkakettem nung adokogo. Panneerselvam-i iba indangji memetet ta jembibaji shingaia mamangtsü,” ta ashi.
“Pai, pa menden nungi alutsü atema rongshi ta jembiogo. Ajisüaka legislature party lenir atema kü tenüng benoksangji pa lir. Pa kü den külemi amen aser kü den-a jembiogo. Anungji ghonda 48 sülen ang pai yazü jembir süra iba mapang nungji kechisa inyak? Shibai shiba den o lemtep? Assembly nung DMK nungi Duraimurugan-i jembiogo, osang lemsateptsüsa lenmang lir asü asü?” ta lai asüngdang.
Sasikala-isa, Panneeselvam-i DMK den o lemtepba ajanga taoba chief minister J Jayalalithaa-i bendanga inyakba tetezü samadaktsüogo, ta aitsü.
“(Jaya asüba sülen) Assembly nung tatalokbatemji ni junga tetzüa aruogo. Pai DMK den o lemtepbaji asen Amma aser party raksatsütsü atema liasü,” ta laisa aitsü.
Panneerselvam-i Sasikala anema jembiba sülen party-i pa treasurer menden nungi anendaktsü aser Dindugal C Srinivasan shima liasü.
Panneerselvam ji Amma-i tai atoksang lir ta shia Sasikala-i, “Janaki-i aniba AIADMK telok nung pai inyakbatem ajak lai (Jayalalithaa) tai toka liasü, iba mapang nung party ana küma lemsa. Lai pa nem maongka ka nungi ka, ta agütsüogo,” ta ashi.
“DMK party züngsemtem aser chief minister tsüngda jembibaji ni meteta lir. General secretary ka mapaji item ama tesendaktep nokdangtsü atema lir,” ta laisa ashi.
Item ama mapa ajanga AIADMK-i kodanga takok mangutsü ta shia Sasikala-i, la den party züngsemtemi AIADMK matsüngdang tetsükdaktsü aruba ajak koktettsü, ta ashi.