Ni kentener tasen ka ama züngshiang:Shaan

September 22, 2015: Ken atenba tsütsü kanga junga amenteter alisang, Shaan-i pa kentener tejen ama mezüngshidaktsüner.
Kentenba sentong “Suron Ke Rang Colors Ke Sang – Salaam Shri Gulshan Kumar” akaba mapang osangbenertem den jembidang, Colors nung CEO, Raj Nayak-i, iba sabang ya kentener tasentem asoshi lir aser iba sentong ya küm nung asemben mesüra pezüben akatsü, ta metetdaktsü.
Sentong agiba mapang Shaan-a sabangi jaketa liasü. Sabang nungi, pai, “Raj-i iba sabang nung kentener tasen nem maongka agütsütsü indang shiogo…. Nia nisung tasen ka amai lir. Ni tain amai mamshidaktsüner, anungji nia kentener tasen ka amai züngshiang. Kü dang kentener tejen ta mejadaktsüner. Nia nenok amai lanur ka ta süner,” ta ashi.
Iba sentong nung pa den külemi Ayushmann Khurrana aser kentener Sonu Nigam nungeria shilem agia liasü.
Ken benjung nung pa adenba asoshi kanga pelar ta ashiba mapang, pai, “Iba sentong nung nia sentaktepa akümba ya kü sasa kanga ajungketa bilemer. Ni Sonu Nigam dang nia tsüngsangba telemsa nung tendakjang ta ashiogo. Joko nüknürar ken ojang tener,” ta ashi.
Iba sentong ya Gulshan Kumar nem tetushi agütsüba aser T-Series küm 30 ajungba nüngtem nung akaba lir. Ayushmann, Sonu aser Shaan nungeri sentong ania liasü.