Ni kibong asemben maküm:Azharuddin

Hyderabad, December 22 (Agencies): Taoba mapang India cricket team nung captain, Mohammed Azharuddin-i December 20 nü pa tang agi tasemben buba kibong akümer masü, ta shiogo.
“Osang ajanga ni asemben buba kibong akümer ta asübaji kenyongi tiyazü osang lir. Imlibilema osang tejangja meteter angsa sangdongang,” ta pai twitter ajanga matetdaktsü.
Osangbener kari pa par medemtsür aser America sensotsür, Shannon Marie den kibong kümogo ta prokshiba sülen pai iba osang aija liasü.
Maharashtra Times osangkaket ajanga ashiba agi, Azhar-i December 19 nü Mumbai nung par gari anisang, Jaan Mohammed’er ki semdangba mapang Shanon ya pa kinüngtsü ta ashi. Gari anisang, Jaan Mohammed tawa ang iba lima nungi pilaogo.
Arishi küm 52 tain, Azhar ya tawa tembangba International Premier Tennis League season (IPTL) asayamung mapang New Delhi nung Indian aces aser Phillippine Mavericks na tsüngda asayadang Shanon den külemi repranga liasü.
Azhar asaya nungi animesüngdang India atema test asaya 99 aser ODI 334 asaya-a liasü. Pa mezüng Naureen den kibong aküm aser la den jabaso ana agi sosema lir. Tena 1996 küm balaba sülen pa ano model liasüba actress akümla, Sangeeta Bijlani den kibong aküm aser la den-a 2010 küm balar asütsü akok, ta bilemer.
1984-85 tsüngda, Azhar mezüng cricket asaya tenzükdang atonga atonga century asem azükba ajanga kanga nüngtugu küma India cricket team captain rongnung takok bena arur tajungtiba ka ta züngshia liasü.
Pai 2000 küm ‘match fixing’ nung adenba ajanga taküm piyong atema cricket asaya nungi anentsüa tenüng tamajung agir anen.
Court-i 2012 küm pa tanaben cricket asayatsü mela, ajisüaka joko menuadoker liasü.
Hyderabad nungbai 2009 küm nungi politics nung ajemok aser Moradabad, Uttar Pradesh nungi Lok Sabha menden atema takok angu. Aji oda süaka, yaküm Tonk-Sawai Madhopur constituency, Rajasthan nungbo takok mongutet.