Ni kiralongrar ka masü: JNU kaketshir Umar Khalid

New Delhi, Feb. 22 (Agencies): February 9, 2016 nü Jawaharlal Nehru University (JNU) campus nung linük anema yimyim ayimba ken o dak sentakba nung kaketshir trok nem tai tonglokja lir, aser parnok rongnung Umar Khalid-i, ni kiralongrar ka masü, ta shiogo.

Deobar aonung tesü Umar Khalid-i, “Ni kiralongrar ka masü” ta ashiba den külemi University campus anema noktaktsü asoshi BJP sorkari kuli nüngdaka liasü, ta pai tai tongloktsü.

JNU ken o tulu akumba sülen campus toktsür ajensang Khalid-i, “Kü tenüng Umar Khalid aser ni kiralongrar ka masü,” ta ashi.

Campus telung nung yasüng Khalid-i, “Amakbaji (university) February 9 nü ayongzüka akaba sentong ajanga masü, saka onok anema inyaktsü atema sorkari kuli nüngdaka liasü,” ta ashi.

Khalid den külemi tai tonglokja alir nisung pezü- Anant Prakash Narayan, Ashutosh Kumar, Rama Naga aser Anirban Bhattacharya nunger Deobar aonung tesü Jawaharlal Nehru University campus-i meyipa aruogo.

“Iba mapang piyong osangbenertemi ni anema aika jembiogo” ta pai ashi.

University nung iba sentong mayongzükdang Khalid-i Gulf linüktem aser Kashmir leni phone call 800 ben süogo ta osangbenertemi prokba osangji tai, ta paisa ashi.

You must be logged in to post a comment Login