Ni langka angazüktsüla

Maka mait indang ni jembir masü, kechiaser kechi tia nungsa ni lidir, iba nungji temulung chia alitsü ni angazükogo. Filipi 4:11

Temulung achibaji langka yimya nungi aruba masü saka ibai angazüktsüla. Paul taküm nung teperi kaa aliba mapang liasü. Aikati ashir parnok teperi kaa lira temulung asütsü. Saka nai tekong 12ji züngra Paula maka-mait, machi-majem tia nunga liasü ta angur. Kodang pa Filipi tepuokdak liasü, pai mulung masü jembi asü? Pai Tsüngrem tenüng sanga ken dena liasü (T.M. 16:25). Iba dangji temulung asüba ta ajatsü akok.

Na kechi maka iba nung ranglokba dang temulung asüba ta majar. Na makaba nai aginüra iba dangji temulung asüba ta majar. Na temulung süa mali. Saka shidakba temulung asübaji na kechi aka iba nung ranglokbaji lir. Na chiyongtsü aser aben süoshi kar asü? Aji lira temulung süa liang (1 Timothy 6:8). Alima nisung aika ibajia maka lir. Na Laishiba kar asü aser nai kong külemner idakji külemtsü nüji kar asü?  Aika iba ama inyaktsü nüji maka lir. Na chiyongtsü, aben-süoshi kara, aser nai mulung dak külemtsü nüji kara, na Tsüngremi kanga moatsügo. Khristan ka ama na kotak nung teti tatem maka mapang indoktsü. Ibai teti tatem maka temoatsüji lir. Item temoatsütem yur, na kechi maka iba nung rangloktsü kecha kuli mali. Na Paul ama alitsü akok aser temulung süa alitsü angazükang.

Oba, tanü ni makabatem nung merangloktsü, saka ni akaba temoatsütem nung rangloktsü kü dang yariang. Amen.