New Delhi, Feb. 17 (Agencies): Jawarharlal Nehru University (JNU) nung linük anema inyakba onük nung tang linük nung ken o tulu adoka Bodhbarnü Patiala House court nung ken o angadangba mapang JNUSU Tir, Kanhaiya Kumar-i, “Ni linük anemer ka masü aser India anema yimyim ayimbaji ni pu-masemer,” ta ashi.
Kanhaiya-isa, “Ni India nunger ka aser India anema inyakba maparentem ni pu-masemer,” ta ashi.
JNU kaketshir Tir, Kanhaiya ya linük anema inyakba ken o nung tai tonglokja apu, aser pa March 2 nü tashi judicial ket nung ayutsü temelaba agütsüogo.
Tanep Kumar okadaki anir aoba mapang obendangertemi pa dak teka sangshia liasü, ta tenük kuli alirtemi ashi.
Ano tanga osang ka nung mapang shia party anema jembir BJP MP, Shatrughan Sinha-i JNU lenir Kanhaiya pusema jembiba den külemi tekaraba nung pa chioktsüla ta khangogo. “Pa tekaratiba nu chioktsü imlar aser sarasademtsür,” ta Sinha-i metetdaktsü.
“Asen Bihar lanur aser JNUSU Tir Kanhaiya-i jembiba onükji angashiogo. Pai linük anema mesüra Linük Temzüng anema kecha mejembi,” ta Sinha-i twitter ajanga ashi.
Bodhbarnü JNU Vice Chancellor, M Jagadesh Kumar-i yimtenren party ajak dang JNU ken o nung tiyongtsüi maittsüla, kechiyong University-i item ama ken o bentettsü koka lir, ta ashi.
Yakünü Patiala House Court telungtet nung kaketshirtem aser tesayurtem dak teka sangshiba aija Kumar-i, “Tesayur kar dak teka sangshi, ta onok nem osang agütsüogo. Parnok dak teka sangshibaji Universtiy-i aitsür, ozüng ajanga tapet inyaktsüla,” ta ashi.
Tanep Supreme Court (SC)-i JNU lenir Kanhaiya kümzüka ayutsüji Delhi Police Commissioner, BS Bassi khuret ta metetdakja liasü ajisüaka pa okadaki anir aoba mapang obendangeri densema tangartemi pa dak azük.
Justice J.Chelameswar aser Justice Abhay Manohar Sapre nati akumba SC bench-i, Kanhaiya den ken o angatsü arur ajak timtem majurutsüji Delhi Police mapa ta metetdakja liasü.
You must be logged in to post a comment Login