Ni Lok Sabha elections nung metokteptsü: BSP tongti Mayawati

New Delhi/Lucknow, March 20 (Agencies): Tanü Bahujan Samaj Party (BSP) tongti, Mayawati-i, lai taruba Lok Sabha elections nung metokteptsü, ta metetdaktsüogo.
Tanü osangbenertem senden ka nung jembidang Mayawati-i, lai election nung metokteptsü, saka election nüboyimba nung ang rangloker inyaktsü, ta metetdaktsü.
Tamalen BSP lenir kari, Mayawati-i Nagina mesüra Ambedkarnagar menden nungi tokteptsü, ta metetdakja liasü.
Uttar Pradesh nung SP-BSP teloktep atema Mayawati aser Akhilesh Yadav nati lokti senden 11 ayonga akatsü. Iba dak alia lai state tesem aika sema nüboyimtsü aser India tesem balala nung BSP atema lokti senden 30 nung nüboyima shilem agitsü.
April 3-4, 2019 anogotem nung BSP tongti, Mayawati-i India south len lar party teloktep aliba state- Andhra Pradesh aser Telangana nung nüboyimtsü.
Uttar Pradesh nung Lok Sabha menden 80 lir aser iba election atema BSP aser SP nati loktepogo. UP nung SP-i menden 37 nung tokteptsü, BSP-i menden 38 aser Ajit Singh-i aniba Rashtriya Lok Dal-i menden asem nung tokteptsü.
Parnoki Sonia Gandhi (Rae Bareli) aser Rahul Gandhi (Amethi) na toktepba menden na nungbo par candidates metoktepdaktsütsü.