Ni maneni noksatem yanglutsü: G Bala

Tirunelveli/Chennai, November 6 (Agencies): Freelance cartoonist G Bala-i Tamil Nadu Chief Minister K Palaniswami aser Police Commissioner indang taitsü aketba noksatem yangluba atema Deobar nü apu. Ajisüaka, Tirunelveli District Court-i Hombar nü pa bail nung chioktsü temelaba agütsü.
“Ni nisung shinga metepset anungji tesasaba kecha mali. Sorkar nung metokmeperi alibatem ni kü noksatem ajanga sayutsü. Ni maneni iba mapa inyaktsü aser manentsü” ta arishi küm 36 tain cartoonist Bala-i ashi.
Tirunelveli District Crime Branch Police-i Bala apuba sülen social media nung nisungtemi iba inyakyim aitsü. Chennai Press Club-ia Hombar nü Chennai nung lungkak aitba sentong ka alitsü ayongzük.
Tiruneveli District Collector Sandeep Nanduri-i ken o ka benokba sülen Deobar nü Chennai nung Bala apu.
October 26 nü Bala-i website ka nung sayuba cartoon nung chief minister tenüng menükja lir, ta police osang ka ajanga ashi.
Sen aputsür kati timtem agütsüba maremteti apuani ka den tanur ana Tirunelveli Collectorate complex nung parnok sasa mi agi rongsettsü merangba lendong sülen anogo ana lir Bala-i cartoon ji yanglur sayu.
Iba lendong ya October 23 nü atalok aser iba anogo nungjisa kinungtsü den tanur anaji asü aser tasüngji kinungboa asü.