Ni memeteti Chidambaram-i affidavit zülushi: GK Pillai

Delhi, March 1 (Agencies) : Taoba mapang home secretary GK Pillai-i, “Congress lenir aser taoba mapang UPA sorkar nung kilonser, P Chidambaram-i kü nem memetetdaktsüi Ishrat Jehan indang affidavit melenshitsü,” ta ashi.
“Chidambaram-i Intelligence Bureau nung inyaker tilar ka jar arua affidavit ji khenyongi tasen küma zülushi. Tangar tebang nembangtsütsü asoshi affidavit nung aliba olung ajakji pai shia züludaktsüba lir,” ta pai ashiba NDTV-i lepshia metetdaktsü.
Yashi, Mongulbarnü Chidambaram-i, Ishrat Jahan ken o nung affidavit tanabuba nung temelenshi alibaji kü mapa lir, ta ashi.
Pai, taoba mapang home secretary GK Pillai-i iba ken o nungi pilatsü merangba ngua ni teimla sama aser mezüng züluba affidavit nung zülua alibaji taginüba ama masüba ajanga tanabuba affidavit ya zülushi, ta ashi.
Affidavit nung nüngdakba melenshitsüji kü teinyaktsü kechiba süra mezüng züluba affidavit ji kü den masüngdangtepi tai zülu,” ta pai shisem.
“Home secretary, Intelligence Bureau nung director aser ketdangsertem den angatetteper külen tanabuba affidavit nung sorkar chichiba teinyaktsü melenshia zülu,” ta Chidambaram-i ashi.
Chidambaram-i Ishrat Jehan ya Lashkar-e-Taiba (LeT) züngsem lir ta zülua aliba olung affidavit nungi agienogo, ta GK Pillai- ashi aser iba nung BJP-i bushisüngdangtsü shiogo.
“Tanabuba affidavit nung koba shilem tai lir ? Iba affidavit dak sentakba ajak kü tebilemtsü lir. Taoba home secretary-ia iba ken o nung kü den saku inyaktettsüba sür nung pai pila aoba ajanga ni pa dak teimla samaogo,” ta Chidambaram-i ANI dang ashi.
“Mezüng benokba affidavit ji ni malidang zülu aser aibelena zülu ta ni angashi. Aser ibaji melenshitsübaji kü teinyaktsü lir. Anungji onoki home secretary, Intelligence Bureau nung director aser ketdangsertem den angatetteper affidavit tanabubaji zülushi,” ta pai ashi.
2009 küm Chidambaram home minister aliba mapang Pillai ya pa kübok liasü aser iba mapang Ishrat Jahan police den kahtepdang asüba ken o atema affidavit ana zülua liasü.
Chidambaram-i, Centre-i iba ken o dak sentakba affidavit nung police-i inyakba tajung tamajung kecha shisema mali asü, ta ashi.
Ministry of Home Affairs ajanga iba ken o dak sentakba file ajak reprangtsü atema osang agütsüdang pai, nenoki yamaji inyaktsü pela shishia agizüker, ta langzüa liasü.

You must be logged in to post a comment Login