Ni merangba ajanga Padma Shri angur : Priyanka Chopra

Mumbai, January 26 (Agencies) : American TV show ‘Quantico’ nung shilem tajung agiba atema sempet ka agizükba sülen actress Priyanka Chopra-i Padma Award nguogo.
“‘Dil Dhadakane Do’ nungi ‘Bajirao Mastani’ nungi ‘Quantico’ atema People’s Choice award aser tang Padma Shri… Ni kanga pelar aser pungmang ka nung alir ama bilemer” ta Priyanka-i metetdaktsü. La tang Monteal nung oa lir aser idak nungjagi osangbener den jembi.
“Ni meranga inyakba ajanga tajangzük angur ta ni bilemer. Ni kü mapaji zübazüba metoktsür” ta laisa shisem.
Priyanka nem Padma Shri agütsür aser iba ya India nung civilian honour rongnung jenjang pezübuba lir.
Tan ita tetenzüklen lai People’s Choice Awards (Favourite actress) angu aser South Asian actor rongnung iba sempet angurji la mezüngbuba lir.
“Ni kanga pelar aser jangra atemer. Iba tetushi anguba atema ni kanga pelar. Taküm ya ni asoshi küm tajung ka lir. Kü mapa nung tenüksünga agizüker ajak dang kanga pelar. Army nung ketdangser ka jala asüba agi iba tetushi ya ni asoshi khenyongi balaka lir” ta Priyanka-isa metetdaktsü.
“Sempet anguba den külemi ni tajungba inyaktettsü ta ajungmesoba dena lir. Kü nem tebilemtsü khuret talila ka agütsüogo aser ni kü tajungtiba atema merangtsü” ta laisa shisem.
Priyanka-i küm ter shi ka film industry nung shilem agia arudang, lai “Fashion”, “Kaminey”, “7 khoon Maaf”, “Barfi!”, “Mary Kom” aser “Bajirao Mastani film tem nung shilem tajung agiogo.