Ni Moscow taruba hopta semdangtsü: Kerry

Paris, December 09 (Agencies): Syria nung adokba mangatettep ken o bentetja par linük nung yimji yimjung tia bener arutsütsü onüktem Russia lenirtem den benoka jembitsü nükjidong nung Russia yimtiba, Moscow taruba semdangtsü sentong renemba olen ka US Secretary of State, John Kerry-i tanü Bodbar nü metetdaktsüogo.

US o Russia nati tawa alima lenirtem ayonger külen parnoki külemi lungjemer Syria Tir, Bashar al-Assad-i aniba Syria sorkar aser sorkar anemertem na tsüngda yimjung tezüngzüktep agia Syria nung yimtenren tebentetbaren lidaktsütsü asoshi maparen tenzüka lir.

Ajisüaka, International Syrian Support Group (ISSG) ta ajaba teloki tan December ita 18 nü US kübok New York nung senden maneni amentsü ayongba sülen US o Russia na tsüngda tesendaktep mejungi akümba osang angazükogo.

“Saudi Arabia sorkari Syria sorkar anemba teloktem den ajurutepba maparen manen tashibo New York yimti nung senden amentsü mayongtsüla,” ta shia, Russia-i New York nung amentsü ayongba sendenji anojungi ayonger ta metetdakja lir.

Tir Assad-i aniba Syria sorkar den jembiteptsü senden amentsü ajungshitsü nükjidong nung Saudi sorkari Syria sorkar anemer lenirtem den ajurutepba osanga jangjaogo.

“Ni taruba hopta Moscow yimti semdanga Russia Tir, Vladimir Putin aser Russia Foreign Minister, Sergei Lavrov na den ajurutepa tena den Syria aser Ukraine na den sentakba onüktem benoka jembitsü sentong renema lir,” ta Kerry-i tanü nenshia ashi.

Russia-i tongti shilem agiba ajanga ISSG-i tawa Vienna nung Syria yimjung senden takok ngua menogo ta pai ashi.

“Russia-i yimtenren aser mitkar teyari agüja Assad nungitba maparen alima dang memiimshi inyaker saka Syria nung yimji yimjung tia lidaktsütsü maparen nungbo alimai Russia den külemi lungjemer nungdakba maparen amalitepa inyaktettsü imlar,” ta Kerry-i shisem.