Ni Mumbai-i sen 2,500 dang bener ao: Nawazuddin Siddiqui

New Delhi, July 22 (Agencies): Film nung shilem tulu aser tajung agitsü nükjidong nung Nawazuddin Siddiqui ya Mumbai-i sen 2,500 bener ao. Saka pa indang sempet yari temoatsü angutsü asoshi Mumbai-i mapang talangka Nawazuddin Siddiqui indang molungsentsü kanga junga tendang.
“Kü taküm nung ni kechiserna aika ajuruogo. Mapang kar nungbo kü pocket nung sen senjang kata maliasü. Aser iba ama ni küm ana-asem tashi lia aru. Khen-khen bo anepdang medemer ka kidang chiyongtsü aser nikongdang anu medemer ka kidang chiyongtsü, aser medemer kati moko alitsütsü,” ta Nawazuddin-i ashi.
“Ni Mumbai-i arudang sen 2,500 dang bener aru. Kü taküm nung ni iba ama tensa mesüra tia ka nung kü kabo nung sen 2,500 dang anüngra, ni tamakok ajuru amai mebilemsü. Ni kicha metsübor,” ta Nawaz-i ashi.
Nawazuddin-i mezüngbuba Bollywood film nung shilem agiba ya Aamir Khan indang Sarfarosh liasü. Arishi küm 43 tain, Nawazuddin ya kanga timtema lia arur ‘Gangs of Wasseypur’ film nung shilem agiba sülen pa indang tia ya kanga junga melenshitet.
Nawaz-i ashiba agi, pa iba ama timtema aliba mapang pai aiben Mumbai ya doktsür meyiba aotsü bilem saka pa indang nükjidong tongtettsü asoshi pai timtem arem.
“Küm 12 tashi ni atadang aser iba ya kü indang telemtetba liasü. Ni atasa tanen maka merangtsü asoshi molungtet. Mapang kaka bo ni Mumbai doktsür aotsü bilem,” ta Nawaz-i ashi.
“Ozü yimdak aliba nüburtemi kü dang, ni actor mükemtettsü, ta ashi. Aser iba ajanga ni yimdaki aotsü mejangra. Aser ni Delhi-ia tanaben meyiba monü, kechiyong yangji NSD nung külemi azünger temi kü dang ‘na-a tanaben meyiba aruogo na?’ ta asüngdangtsü aser ni aji maginü,” ta pai shisem.
Iba ama timtema lir pa jenjang tajungba kümaka Nawaz-i mezümükema mebilemer.
“Gangs of Wasseypur sülen ni kanga mazüngi arur. Kü indang takok aser ‘stardom’ indang shisadangtsü asoshi mapang mangu. Kü indang mezüngbuba teinyaktsü ji film nung shilem agitsüba ya lir. Nisung aikati kü indang yimya melenshir ama bilemer, saka ni kasa dang lir,” ta Nawaz-isa shisem.
“Ni sen mesüra konang asoshi inyaker masü saka kü lenmang nung ajangshiba tem ya tongtibangba lir. Tamakok ajuruba tem ya rongsen agi alizüktsü makok. Item ajanga ni tanü iba jenjang nung nokdakteta lir. Ni imlaba dang tuluba jenjang nung ni nokdaka lir,” ta pai-sa ashi.
“Tangari meinyaktetba ka ni inyakteter ta sayutsü asoshi ni film nung shilem magir. Nü taküm nung nai kechi inyaktsüar, mapang-i ashitsü,” ta Nawazüi maneni ashi.
Nawazuddin den Tiger Shroff aser Nidhi Agerwal nungeri külemi shilem agiba ‘Munna Michael’ filem tanü sayaogo.