‘Ni Nobel Prize pela agizüker’:Bob Dylan

Stolkholm/New York, October 29, 2016 : Bob Dylan nem Literature nung Nobel Prize agütsütsü sangdongba sülen anogo 16 tashi pai ola madoki lir külen tang pelaba osang metetdaktsüogo. Ajisüaka December ita nung iba sempet agütsüba sentong nung pa dentettsü medentetsüar mejangjang amai pai shishiogo.
October 13, 2016 nü pa nem iba sempet tulu agütsütsü metetdaktsüba sülen hopta ana shi süir külen US nunger ken zülur aser kentener Dylan-i, “Ni iba sempet pelashishia agizüker,” ta ashi.
“Ni Nobel Prize angutsü ta angashia kechiang meshi aküm,” ta iba sempet agütsür telok, Swedish Academy nung permanent secretary, Sara Danius den jembidang ashi. Pai, “Ni iba sempet kanga akhümtsübur,” ta shisem.
Nobel committee temi pa dangi call asüba joko anener aliba mapang ka nung Bob Dylan-i parnok call asü mesüra parnoki ano khen call südang asütsü akok. Pai call aiben magizükba ajanga Nobel committee nungi züngsem kati hopta ka tejakdang Dylan-i tangar mezüngshir aser kanga asükümer ta shir liasü.
America nunger ken züluba otsü nung Dylan-i sangro jenjang balakati anir atuba ajanga pa nem iba sempet agütsütsü October 13, 2016 nü sangdong. Novel zülur aikati pa dak iba sempet malang ta ashi kechiba süra pa sangro zülur masü saka ken zülur katang lir.
Nobel Prize angurtem nem sempet aser cheque ajak December 10 anogo nung Sweden Chuba Carl XVI Gustaf-isa agütsür.
Britain Daily Telegraph osangbenertem-i pa dang iba sempet agizüki aotsü maotsü ta asüngdangdang pai, “Kokrangbala aotsübasa,” ta langzü.
Dylan-i, “Ni iba sempet angutsü ta asüba ya mamangteter. Iba ama akhümket sempet angutsü shibaibo imlatsü,” ta osangbenertem dang ashi.
Literature nung Nobel Prize angur mezüng kentenerji Bob Dylan lir.
Nobel ceremony ya December 10, 2016 nü agitsü aser iba mapang Sweden Chuba Carl VI Gustaf-i Dylan nem sen pound 750,000 senpet dena agütsü sentong lir.