Ni Oscar sempet agizüktsü mejangrar: Salman Khan

New Delhi, October 01 (Agencies): Bollywood superstar, Salman Khan-i Oscar sempet agizüktsü mejangraba olen ka metetdaktsüogo.

2015 küm yangluba film rong nung nüburtemi kanga dang tsüratema reprangba film, Bajrangi Bhaijaan film nung tongti shilem agisang, Salman-i tan agi 6 ben buba atema reality television sentong, Bigg Boss 9 atonga anitsü sentong renema lir.

Sangküm 2016 küm agütsütsü renemba Oscar kübok Best Foreign Film shilem asoshi benoktsü renemba film rong nung Salman’er Bajrangi Bhaijaan film-a densema liasü saka tatem nungbo Marathi oshi nung yangluba Court film ang India tenüng nung Oscar-i yoktsü shimtet.

Oscar sempet asoshi Bajrangi Bhaijaan film meshimba den osang agitepdang, “Asia nüburtem asoshi iba filmji yanglu aser India, Pakistan aser China nung alirtemi filmji kanga dang sapua reprangogo. Ni senotsü tajangzük angutsü nükjidong nung film meyanglur,” ta Salman-i langzü.

“Teprangertemi film kanga ayonga yanglur ama repranger saka film yanglutsüji kanga dang tasak lir. Film yangluzükba den külemi, kü mapaa idakji atemer. Tesülen film tajungtem shimteta Oscar sempet agizüktsü asoshi benokteper. Ajisüaka, ni Oscar sempet agizüktsü mejangrar,” ta pai shisem.