Ni PM Modi dang asüngdangbatem pai melangzü: Rahul Gandhi

New Delhi, March 04 (Agencies): Yashi Lok Sabha nung Ato kilonser Narendra Modi-i Congress tatong Tir, Rahul Gandhi kanga aija jembiba atema aija tanü Rahul-i, Assembly election nung Bihar nung atalokba ama Assam nüburtemia state nungi BJP meyipa yoktsü, kechiyong Ato kilonseri nangzükbatem meinyaker, ta ashi.

Rahul-i, Brihostibarnü Modi-i pa aitsüogo, saka pai asüngdangbatem melangzü, ta ashi.

Assam election dak sentakba nung Rahul-i, vote angutsü atema BJP-i regional party aika den lokteper ta ashi.

Rahul-i, opposition (Assam nung BJP) loktepba ajanga Congress-i küm 15 yimsüsüdang Assam nung temeimtep aser terenlok katsüba raksatsütsü, ta ashi.

Congress lenir Rahul-i, “Pai (Modi) ghonda ka ser minute 15 shi jembidang ni aitsü. Pai Indira aser Rajiv Gandhi nungeri jembiba o süoka jembi. Ajisüaka ni pa dang asüngdangba ka danga pai melangzü. Ni pa akhümtsübur. Pa ya linük Ato kilonser. Ni pa dang tasüngdangba pezü asüngdang saka pai melangzü,” ta ashi.

Yakünü Parliament nung jembidang Rahul-i sorkari black money meyipa bener arutsü atema nangzüka aliba tasüngdangba den külemi sorkar indang ‘Make in India’ mapatong ajanga mapa kwi adokdaktsütet ta asüngdangba Modi-i melangzüba dak sentakba nung Rahul-i, “Nai melungba ama kü nija aija jangratemang, ajisüaka ni asüngdangba pezüji langzüang,” ta ashi.

Brihostibarnü Rahul aija Modi-i, “Nisung karbo arishi küm nung tain akümer saka shisatsübo mainer,” ta jembia liasü.

You must be logged in to post a comment Login