Ni RSS indang jembiba nungi masetshir: Rahul

New Delhi, August 25 (Agencies): Mahatma Gandhi tepsetba nung RSS-i shilem agi ta aitsüba nungi Congress lenir, Rahul Gandhi-i o meyipshiogo ta aitsüba dak sentakba nung tanü pai, pai jembiba o nungi masetshir, ta ashi.
Congress tatong Tir, Rahul-i twitter ajanga, “RSS indang telemsa adokdaktsüba aser tesemba onük anema ni raraba manentsü. Ni jembiba olong shia nungi ni masetshir,” ta ashi.
Yashi Supreme Court dang Rahul-i, Mahatma Gandhi tepsetba atema pai RSS nem tai metongloktsü saka iba tentet nung nisung kar nem tai tongloktsü, ta ashi.
Yashi okadak Rahul-i jembiba o nung ajemdaker pa atema okatsür, Kabil Sibal-i, “RSS-i Mahatma Gandhi tepset ta ni kodanga mejembi, saka RSS den sentaktepa alir nisungtemi tepset ta jembi,” ta metetdakja liasü.
Rahul-i iba ya tweet masüdang tanep Information & Broadcasting Union Minister, M Venkaiah Naidu-i, Congress tatong Tir dangi shisatsü aruogo, ta jembia liasü.
Naidu-i,”Tatemsabo Rahul-i Supreme Court dang Mahatma Gandhi tepsetba atema RSS nem tai metongloktsüta jembibaji junger. (Rahul dangi) Shisatsü aruogo. Ibaji meyipshishia jembiba ka lir, ajisüaka junga meyipshiogo. RSS ya linük meimba tentet ka lir,” ta jembia liasü.