Ni Salman Khan ama nüngtugu kümner: Harshaali

Kolkata, May 18 (Agencies): Actor Salman Khan-i tongti shilem agiba film ‘Bajrangi Bhaijaan’ nung tetsür chanu ka tenüng agi ‘Munni’ shilem agila, Harshaali Malhotra Deobarnü Kolkata nung jewellery brand ka tenzükba sentong nung dena liasü, aser lai osangbenertem den lai sapuba chiyungtsü, nüngtugu akumba densema la tebilemba aika lemsatepa liasü.

Nai tang mezüng Kolkata semdanger asü aser iba yimti ya junger ma, ta asüngdangba langzüdang arishi küm 9 Harshaali-i, “Iba yimti ya junger, saka kanga tatsük! Aser hotel-i arudang ni tzü ayimba tiyong nung ‘globe’ ka dang angu aser ibaji junger liasü ,” ta ashi.

Bajrangi Bhaijaan film tangokdang nai kechisa ajangshi ta asüngdangba langzüdang lai, “Iba film tangokdang ni jangratema mungogo. Ni tesaputiba actor ji uncle, Salman lir aser film tangokba tetsüngda nung küna table tennis sa asayaa liasü. Pa tasoba anogomung nunga ni pa ajuruogo. Iba film sülen ni kanga mazüngi akum. Tangbo ni act asür, tsüngsanger aser ken atener. Item ajak rongnungi ni ken atentsü jangrar,” ta ashi.

Na mazüngi aliba aser study asüba mapang koma liromedema amshir ta asüngdangba langzüdang lai, “Ni tang Mumbai nung aliba school ka nung class 3 nung azünger aser lesson bushitsü jenti lir! Anungji acting asüba tetsüngda mapang nung ni study asür aser homework tembanga inyaker. Ajisüaka ni uncle Salman ama superstar kümner, ni acting aser tsüngsangba nung meranga inyaker. Atangji ni study-a meimer. Ni kü adianu den saisaponger,” ta ashi.

Bajrangi Bhaijaan film sülenbo school nung nü nem maongka balaka agütsür asü ta asüngdangba langzüdang lai, “Nunga,  homework tembanga meinyakra ni temerenshi achir,” ta ashi.

Nai tesaputiba chiyungtsüji kechi ta asüngdangba langzüdang lai, “Ni an shi tesaputiba! Ni iba yaa shiner, ni tesaputiba sentsüji ‘purple’ lir aser ni Doraemon cartoons meimer,” ta ashi.

Ano tanga tasüngdangba ka langzüdang lai, “Ni kongisa odir nisungtemi kü den jembir aser kü noksa den selfie agir, aser ni ibaji maginer. Osangbenertem senden nung noksa tangokertem nungtepa noksa tangokteper. Ni ibaji tsübua liasü, ajisüaka tangbo ni ibaji metsübur,” ta ashi.