Ni shiruru atema ajak inyaktsü:Athiya Shetty

December 20, 2016 : Actress Athiya Shetty-i, ni shiruru atema ajak inyaktsü, ta ashi. Lai, “Ni shiruru metsüba aser aliba tesem mapang shia semdanga item shiruru kümzüka ayutsü lemsateper kechiba süra ni shiruru kanga meimer.Ni shiruru kümzüka ayuba den tanurtem nem kaketshisatsü agütsütsü atema tesayuba agütsütsü kanga jangrar. Ni item taküm aliba shirurutem atema tapu ajak inyaktsü,” ta ashi.
Athiya Bollywood nung 2015 küm ‘Hero’ film nung mezüng shilem agi aser iba film ji superstar Salman Khan dena produce asü. Asenoki ano memunui la ‘Mubaraka’ film nung angutsü aser iba film nung lai Arjun Kapoor aser Anil Kapoor na den külemi shilem agitsü.
Suniel Shetty’er jala, actress Athiya-i, ni shiruru kümzüka ayuba tsütsü tangatettsü aser tanur ajak (tetsür aser tebur) kaket shisatsü agütsütsü atema angatetdaktsüner. Ni kaket shisatsü anguba atema pelar kechiba süra iba ya ajanga kü taküm atema lenmang aisülen tangazükba tulu angu,” ta ashi.
Kaket shisatsü anguba ajanga ni küsasa kü dak temulung alemer aser alima den chitepteter. Iba den külemi ni bilembatem marendaki lemsatepteter. Anungji tanur ka asoshi kaketshisatsüji kangasa tongtibang,” ta arishi küm 24 tain, Athiya-i ashi.