Ni shiti jashidang amai inyaker: Farhan Akhtar

November 19, 2015: Actor aser film yanglur Farhan Akhtar-i, “Ni ya mapa inyaktsü nung shiti jashidang amai lir,” ta ashi.

“Ni kechiba aji ashir süra, langka tajung inyaktsü asoshi iba yimyaji asenok dak alitsü kanga nüngdaker,” ta Farhan Akhtar-i pai direct asüba action-thriller film “Wazir” sayaba mapang ashi.

Pai iba o jembiba ya chess asayaba den atishia ashiba lir.

Chess nung shiti-i kanga indanga jajaba rasaa ashidang pai, “Nisung ka dak teti nüngdakbatemji mapang, ochi ashiba aser nendaka inyakba,” ta ashi.

“Actor kati director aser producer tem nem itemji agütsütettsüla. Parnok den kanga ochishia indang indanga alitsü nüngdaker. Pei dak aliba sempet tajungtiba agi nendaka inyaktsüla. Kecha agia asen manokshitsüsa alitsüla,” ta pai ashi.

“Wazir” film nung Farhan-i ATS officer ama shilem agitsü,. Film nung Amitabh Bachchan-a shilem agia lir.

Film nung Neil Nitin Mukesh-i Wazir ama shilem agia lir.

Neil-i, “Iba film nung kü shilem, ‘Wazir (minister)’ agi ni kanga tenük asünger aser iba shilem ya tajungba lir. Ni jilo ajak melamela angazüka benshiteter” ta ashi.

“Ni shilem tasak ka merangdangba mapang kü sempet metepseter. Ni ibaji kanga meranger aser ni Wazir ama shilem agitsü maongka anguba asoshi kanga pelar,” ta pai ashi.

“Wazir” film ya January 8, 2016 nü nungi sayutsü sentong lir.