Ni Sonia aser Manmohan kodanga majurudang: Michel

New Delhi, May 11 (Agencies): Sen crore 3,600 indang AgustaWestland helicopter alitsü tezüngzüktep agidang tiyongtsü nung jembisang, Chirstian Michel-i, VVIP helicopter alidaktsütsü atema pai kodanga Congress Tir, Sonia Gandhi mesüra taoba Ato kilonser, Manmohan Singh ajurua mejembi, ta ashi.

Iba tezüngzüktep agitsü atema pai Sonia Gandhi, Singh mesüra taoba mapang Defence Minister, A K Antony nunger ajurur asü ta Abu Dhabi nung TV Today news channel-i asüngdangba langzüdang Michel-i, “Nunga, kodanga majuru. Ni parnok shinga majuru,” ta ashi.

Süpokrem agiba mangatettep ken o nungi pa paitoktsü meranga Michel-i, pai Delhi nung taoba IAF Chief, S P Tyagi ajurua khenbo salemogo, ajisüaka Tyagi ji Italian businessman, Guido Haschke aser tanga middleman ka den tesentaktep aliba ajanga pai pa paitoktsü merang, ta ashi.

“Ni pa (S P Tyagi) khenbo Gymkhana club nung ajuruogo, aser yangji ni pa den salem. Ajisüaka pa Haschke den tesentaktep aliba ajanga ni pa paitok,” ta Michel-i ashi.

Paisa, iba tezüngzüktep indang BJP MP, Subramanian Swamy-i yazü mejembi, ajisüaka pa dang yazü shir ama bilemer, ta ashi.

“CAG report nung alibaji pai jangjaogo. CAG report ji aritepa renem, kechiyong tezüngzüktepji magitettsüsa ka liasü,” ta Michel-i ashi.

Tamalen Michel atema okatsür, Rosemary Patrizi Dos Anjos-i, Michel maputsü ta shira pa India-i arua bushisüngdangertem ajurutsü melunga lir, ta metetdakja liasü.

VVIP helicopter alitsü tezüngzüktep agiba nung tiyongtsü ia jembir nisung asem dak India-i temelung malemer, aser parnok rongnung Michel densema lir.

Central Bureau of Investigation (CID) aser Enforcement Directorate (ED) napronglai Interpol Red Corner Notice kübok Michel tenüng agüja lir.

Iba ken o nung CBI aser ED natia Tyagi dang asüngdangyaogo. Company-i India nunger nem iba tezüngzüktep agitsü atema süpokrem agüja lir ta tai tongloktsüba dak sentakba nung 2013 küm CBI-i ken o ka benoka liasü.