Ni taküm ali tashibo Bengal melemsadaktsütsü: Mamata

Kalchini, March 16 (Agencies): Sting operation dak sentakba nung tanü West Bengal chief minister, Mamata Banerjee-i, state assembly election agitsü mapang ana nung lia Trinamool Congress aitsütsü atema opposition party tem longjemogo, ta ashi.
Kalchini nung assembly election atema nüboyimba lokti senden ka nung jembidang Chief minister-i, media kar opposition party tem den longjemer inyaker, aser ibaji tesülen ni jungkai adoktsütsü ta metetdaktsü.
Mamata-i, “Tesüiba küm pezü nung onoki terenlok mapa aika inyakogo. Terenlok tsütsü linük nung yimtenren party shingaia yamaji inyakteta mali. Ajisüaka opposition party temi terenlok mapatemji mepreprangteter. Onok aitsütsü kija atema dang parnoki nüboyimer,” ta ashi.
“TMC aitsütsü atema parnok longjemogo. Media telok kar parnok den dena lir. Ni tangbo parnok (media) ji memetetdaktsütsü, saka tarutsü nung ni parnok jungkai adoktsütsü,” ta laisa ashi.
Banerjee-i ashiba agi, lai Bengal nüburtem dang nungi ochi temeten bushitsü.
“Onoki parnok (Bengal nüburtem) dak tamang rangben akar. Opposition party temi West Bengal nung telemsa adokdaktsütsü neranger, ajisüaka ni taküm ali tashi nungbo, ni ibaji memelatsü,” ta lai ashi.
Sting video ka nung TMC lenir kari taila nija company ka dang nungi süpokrem agiba video yimjak nung sayaba sülen TMC aitsüba mapang ka nung lai item o jembiogo.
CPM, Congress aser BJP longjemer TMC anema inyaker ta aija lai, “Congress-i par party CPM aser BJP na dang yoktokogo. Tang CPM-i lendenlen assembly menden nung takok angutsü atema tenemlen telemsa adokdaktsütsü merangertem teyari bushir. Yimtenren tangatetba aliba party kati yamaji meinyaker,” ta ashi.
Taküm West Bengal dak alia Assam, Tamil Nadu aser Kerala state tem den Union Territory of Puducherry nunga assembly election agitsü.
West Bengal nung April 4 nü election tenzüktsü aser May 5 nü election tembangba sülen May 19 nü election osang sangdongtsü.
Lar sorkari state nung terenlok mapa balala inyakba metetdaktsüba den külemi lai, item scheme tem ajanga lokti ajak ajangzükogo, ta ashi.