Ni Tamil Nadu nüburtem den teloktep yanglu: J Jayalalithaa

May 19, 2016 nü Tamil Nadu assembly election osang sangdongba sülen Chennai nung nüburtemi Chief Minister, Jayalalithaa külemba aser tenüngsang agütsüba noksa nung angur. 

Chennai/New Delhi, May 19 (Agencies): State pongu nung assembly election agiba sülen tanü election osang sangdongogo, aser Tamil Nadu nung AIADMK-i menden 130 dak tema anguba sülen AIADMK tongti aser state Chief minister, J Jayalalithaa-i, “Ni Tamil Nadu nüburtem den lokteper election nung toktep,” ta ashi.
Party-i takok anguba sülen Jayalalithaa’er kima lai, lar party shimba atema vote agütsürtem dang pelar aser lai maneni Tamil Nadu nüburtem atema inyaktsü, ta ashi.
“Tamil Nadu-i onok nem takok tulu agütsüba ajanga ni kanga pelar. Iba takok tulu agütsüba atema ozü party aser ni Tamil Nadu nüburtm dang sentsüh lir,’ ta ashi.
Küm 32 nung tang mezüng Tamil Nadu-i party ka nem anabenren tashi atonga shimogo aser J Jayalalithaa maneni chief minister asütsü.
“State nüburtem dang pelabaji o agi lemsateptsüsa osep (dictionary) nung olongtem mali. Tamil Nadu nüburtem tenzüktsüba dak alaka ni tejangraba tanga mali,” ta laisa ashi.
Tanep 9:30 ako tashi nungbo party-i takok anguba osang meteta tanü lar kima adenshia benjungteptsü tenzükogo.
Exit polls timba ka ajanga arishi küm 67, M Karunanidhi aser par DMK-i takok angutsü ta takzüteta liasü, ajisüaka AIADMK-i ang takok nguogo.
Election anogo matongang Jayalalithaa-i lar party tashii arura vote agütsürtem nem cellphones densema oset angati agütsütsü aika nangzüka liasü.
Tamil Nadu nung election jakdang CM aser AIADMK general secy., Jayalalithaa-i lar party manifesto sayadang, tetsürtem scooter alitsü atema subsidy agütsütsü aser ration card alir ajak nem mobile phone angati agütsütsü, ta nangzüka liasü.
Party manifesto nung tenangzükbatem rongnung- teintet rogotem bus nung angati senzütsü, tenla ki aser mosques yanglushitsü atema senotsü agütsütsü, set top box angati agütsütsü, bus stand/complex/parks nung WiFi angati, kibong akumer nem hon touzük gram 4 agüja aliba nungi gram 8 agütsütsü aser Vitamin A, D den iron tablets angati agütsütsü.
Lar sorkar tashii arura school tanurtem nem anüngdang chiyungtsü dang masü saka anepdang chiyungtsüa dena agütsütsü, Lokayukta tentettsü, maternity assistance leave ita 9 agütsütsü, Amma banking card agütsütsü, angopurtem nem Housing scheme, Class 11 aser 12 kaketshirtem nem maneni laptops angati agütsütsü, ta nangzüka liasü.