Ni tekolok meshidaker ayudak khen ayu: Randy Blythe

November 27, 2015: Rock kentener telok, Lamb of God nung ken atensang, Randy Blythe arishi küm 24 asüdang tetong den pilaba sülen aoseta asütsü asoshi pai amoa aotsü mozü aser yi na külemi chia ajem, ajisüaka pa masü kanga tawaktsü atua sak aser par ki rongtoktsü merang.
Randy-i, “Ni yimsa-a ogo. Ni tetsür ka den pilaba ajanga kü taküm mejungi aküm ta ni meshiner ajisüaka tamajungba ang akümer,” ta tekolok anema aliyim tsütsü inyaker telok, You Rock Foundation dang ashi.
“Ni tangar kiyim benjung ka nung dener ki atongdang yi agi meseper liasü aser iba den külemi ni amoa aotsü mozü pongdang ana asem ka achi. Iba sülen ni meden ka nung longtaka mejanger ni joko iba alima timtem nungi pilatsü….ni kanga pelar ta tasütsü ada liasü. Aji oda süaka mapa tatsüka lir ni yi agi kanga meseper sowar ama sak aser kidang aliba süng agi yangluba osettem gas stove ma nung yur mi jangrolokdakja ki rongtoktsü merang,” ta pai ashi.
Kidanger kati emergency services nem osang agü aser iba sülen pa Virginia nung aliba mozü ki kati anir ao.
Randy-i, “Ni mi adokdaktsüba sülen ozü ki sülen aliba süngtong nung sangzüa, kidang mi adokdar ta ayimten. Idangji police aru aser parnoki ni ‘handcuff’ agi alen. Parnoki ni tekolok meshidak amai bilem…..parnoki kü shisa bulu metet aser mangatet. Ni iba lima nungi pilanüa liasü. Iba sülen parnoki ni tekolok meshidaker ayuba takdang ka nung anogo asemnü ayu, ta ashi.
Pai ashiba agi, pa memelenshiba mapang küm 20 shi drugs aser yi lar liasü.
“Iba sülen ni kodanga kü sasa soseta asütsü memerang. Ni iba otsü ya shinga dena mejembi aru. Ni yi aser drugs taliba anga chia ajemtsü tenzük…ajisüaka nisung kar teyari ajanga item teraksatsüba chiyutsü entoker kü taküm tajungba aküm,” ta pai shisem.