Ni telungpur den tesentaktep mali: Manipur MLA

Imphal, January 13 (Agencies): Manipur nung Congress MLA, Thounaojam Shyamkumar-i, Delhi Police-i pa Manipur nung aliba telungpur telok ka den tesentaktep lir ta tai tongloktsübaji tai ta shiogo.
Hokolbarnü Imphal nung par kidang osangbenertem den jembidang Shyamkumar-i, police-i tai tongloktsübaji tai, ta ashi.
Pua aliba telungpur ka dang asüngdangyaba sülen Brihostibarnü Delhi Police-i Shyamkumar nem tai tongloktsü, aser iba dak sentakba nung pai, “Tai tongloktsübaji tajemdakdak mali. Iba tai tongloktsübaji tia maka,” ta ashi.
“2007 küm nungi iba police ketdangser jagi ni arishir. Iba police ketdangser jagi tai tongloktsüba nung ajemdaker 2007 küm ni apu,” ta ashi.
“Ajisüaka court-i kuli kecha mangu, aser ni chiok. Iba sülen ni election nung toktepa Andro Assembly constituency nungi takok angu. Ozüng agi melelaba telok kecha den-a ni tesentaktep mali,” ta MLA-isa ashi.
Shyamkumar-i ashiba agi, pai public distribution system (PDS) teyaritem aser MLAs` development fund (MLADF) agütsütsü memulungba sülen telungpur telok kari pa tepsettsü meranger.
“Bomb rema yutsüba, bomb amshia amakba aser prangpong amshia mendanger amakbatem liasü,” ta paisa ashi.
Congress party osang ajanga ashiba agi, police-i tai tonglokja aliba nungi Shyamkumar-i pasasa mejenbura party nung bangdakpurtemi Manipur nung taruba Assembly election nung tokteptsü atema pa nem party ticket magütsütsüa akok.
Party candidate tem tatemsa shimtsü asoshi tang Manipur Chief Minister, Okram Ibobi Singh aser state Congress Tir, TN Haokip na Delhi-i oa lir.
Tang tashi nungbo telungpur telok jagi iba dak sentakba osang kecha metetdakja mali.